قازاقستاندا مەكتەپ فورماسىنىڭ بولماۋىنا بايلانىستى وقۋشىنى ساباقتان شەتتەتۋگە بولا ما، جانە سىرتقى كەلبەتكە قويىلاتىن تالاپتاردى بۇزعانى ءۇشىن اتا-انالار قانداي جاۋاپكەرشىلىككە تارتىلاتىنى ءتۇسىندىرىلدى، دەپ حابارلايدى infohub.kz سايتى.
وقۋ-اعارتۋ ءبىرىنشى ۆيسە-مينيسترى شىنار اقپاروۆا وكق-داعى بريفينگتە «ءبىلىم تۋرالى» زاڭعا سايكەس بالالاردى وقۋ پروسەسىنەن شەتتەتۋگە جول بەرىلمەيتىنىن ەسكە سالدى. «بالانىڭ ساپالى ءبىلىم الۋعا قۇقىعى بار. سوندىقتان مەكتەپ فورماسىنىڭ تالاپتارىنا ساي كەلمەيتىن كيىممەن كەلگەن بالانى مەكتەپكە كىرگىزبەۋگە بولمايدى»، — دەپ اتاپ ءوتتى ول.
سونىمەن قاتار، زاڭناما تالاپتارىن بۇزعانى ءۇشىن اتا-انالارعا جاۋاپكەرشىلىك قاراستىرىلعان. اقپاروۆانىڭ ايتۋىنشا، «ءبىلىم تۋرالى» زاڭنىڭ 47-بابى ءبىلىم الۋشىلارعا قاتىستى بولسا، 49-باپ اتا-انالاردى ءبىلىم بەرۋ ۇيىمى اتا-انالار كوميتەتىمەن جانە قامقورشىلىق كەڭەسىمەن بىرلەسىپ بەلگىلەگەن مەكتەپ فورماسىن كيۋ ەرەجەلەرىن ساقتاۋدى قامتاماسىز ەتۋگە مىندەتتەيدى. بۇل نورمالاردى ساقتاماعانى ءۇشىن 5 اەك مولشەرىندە اكىمشىلىك ايىپپۇل قاراستىرىلعان، بۇل 21 625 تەڭگەنى قۇرايدى.