ءانشى مەرۋەرت تۇسىپباەۆا مەن جۋرناليست ءلايلا سۇلتان قىزى اراسىنداعى پىكىرتالاس الەۋمەتتىك جەلىدە قىزۋ تالقىلانۋدا. داۋدىڭ تۋىنداۋىنا مەرۋەرت تۇسىپباەۆانىڭ جۋرناليست ءلايلا سۇلتان قىزىنىڭ ونەر ادامدارىن ەسىرتكىگە تەكسەرۋ تۋرالى ۇسىنىسىنا بەرگەن جاۋابى سەبەپ بولدى.
بۇل تۋرالى Infohub.kz اقپارات اگەنتتىگى حابارلايدى.
مەرۋەرت تۇسىپباەۆانىڭ نارازىلىعى
مەرۋەرت تۇسىپباەۆا ونەر يەسى رەتىندە ءجۋرناليستتىڭ باستاماسىن سىنعا الىپ، قوعامدا باسقا دا ماڭىزدى ماسەلەلەر بار ەكەنىن العا تارتتى. ول ونەر ادامدارىنا عانا نازار اۋدارۋدىڭ سەبەبىن تۇسىنبەيتىنىن ايتىپ، ءلايلا سۇلتان قىزىنا بىلايشا ساۋال تاستادى: "مەملەكەتتە باسقا ماسەلە جوق پا؟ حالىققا بۇدان نە پايدا، ءلايلا؟ ءبىزدىڭ ەلدە باسقا ماسەلە جوق پا؟ تىستەرىڭ تەك ونەر ادامدارىنا عانا باتا ما؟ بىرەسە مەككەگە بارعان ونەر ادامدارىنا، بىرەسە اجىراسقان ارتىستەرگە، ەندى ولاردىڭ ەسىرتكى قابىلداۋىن تەكسەرۋ قالدى ما؟ مىقتى بولساڭدار باسقا ماسەلەنى نەگە كوتەرمەيسىڭدەر؟ حالقىما پايدالى ماسەلە جوق پا؟ ءبىتتى مە؟ ءارتىستىڭ كورپەسىن كوتەرۋ عانا قالدى ما؟" – دەپ جازدى ءانشى Instagram پاراقشاسىندا.
ءلايلا سۇلتان قىزىنىڭ جاۋابى
جۋرناليست ءلايلا سۇلتان قىزى بۇل سىنعا جاۋاپ بەرىپ، ماسەلەنىڭ تەك ونەر ادامدارىنا قاتىستى ەمەس ەكەنىن، جالپى قوعامعا اسەر ەتەتىن تۇلعالار تۋرالى ەكەنىن اتاپ ءوتتى. ونىڭ ايتۋىنشا، اڭگىمە جاستار مەن بالالاردىڭ دەنساۋلىعىنا دا قاتىستى. "مەرۋەرت جالپى نە ايتىلعانىمەن، باسقامەن تانىس بولدىڭ با؟ جاستاردىڭ، بالالاردىڭ اراسىنداعى جاعداي سەنى مازالاماي ما؟ دەنساۋلىقتارى مازالاماي ما؟ الدە ولار ماڭىزدى ەمەس پە؟ اڭگىمە جالپى تانىمال ادامدار تۋرالى جانە تۇركياداعى جاعداي مىسالعا الىنعان تۇعىن. قوعامعا اسەر الاتىندار تۋرالى، كۇرەستىڭ جان-جاقتى بولۋى تۋرالى. جانى، ءتانى، دەنساۋلىعى تازالار ەشتەڭە ويلامايدى، كەرىسىنشە بىرگە كۇرسەدى. اينالاداعى لاسپەن"، – دەپ جاۋاپ بەردى سۇلتان قىزى.
داۋدىڭ جالعاسى
مەرۋەرت تۇسىپباەۆا بۇل جاۋاپقا دا قاناعاتتانباي، تەك ونەر ادامدارىن عانا ەمەس، بارلىق سالاداعى ادامداردى تەكسەرۋ كەرەكتىگىن ايتتى. "باسقا سالاداعى ادامدار سۋداي تازا، سوندا ارتىستەر عانا ءشوپ شەگە مە؟ وندا تولىعىمەن بارلىعى تەست ءوتسىن"، – دەپ پىكىرىن ءبىلدىردى ءانشى.