ليونەل مەسسيدىڭ جۇبايى انتونەللا روكۋسسو كۇيەۋىنىڭ ارگەنتينا قۇراماسىنداعى كارەراسىن اياقتاۋ تۋرالى شەشىمىنەن كەيىن وعان جىلى سوزدەرمەن ۇندەدى، دەپ حابارلايدى infohub.kz.
ول Instagram-داعى پاراقشاسىندا: «ءومىرىڭنىڭ بۇل كەزەڭىن وسىلاي اياقتاعانىڭمەن قانشالىقتى ماقتانامىن. قانشاما جىل، قانشاما ءسات، قانشاما قۋانىش جانە، ارينە، تاعدىردىڭ قانشاما اۋىر سوققىلارى. سەنىڭ قينالىپ، قۇلاپ، قايتا تۇرعانىڭدى كوردىم. ءبارى قالاعانداي بولماعاندا دا، سەنىڭ العا ۇمتىلعانىڭدى جانە قايتا-قايتا ماقساتىڭا جەتۋگە تىرىسقانىڭدى كوردىم. سونشا جىلدان كەيىن ماعان سەنىڭ ارماندارىڭنىڭ ورىندالىپ، ءومىرىمىزدىڭ ەڭ باقىتتى كۇندەرىن باستان وتكەرگەنىڭدى كورۋ باقىتى بۇيىردى»، — دەپ جازدى.
روكۋسسو وسى جىلدارداعى ەڭ ماڭىزدىسى — بالالارىمىزدىڭ اكەلەرىنىڭ ۇلكەن ەڭبەكتىڭ ناتيجەسى بولعان جەتىستىكتەرىن كورىپ وسكەندىگىن اتاپ ءوتتى. «مۇمكىن، ءبىر كۇنى ولار سەنىڭ جولىڭنىڭ قانشالىقتى ۇلى ەكەنىن شىنىمەن تۇسىنەر. ال بۇگىن ولار جاي عانا اكەلەرىمەن ماقتانادى. ال مەن سەنىمەن ماقتانامىن. سەنىڭ جولىڭمەن، باسىڭنان وتكەرگەندەرىڭمەن جانە ەڭ باستىسى — وسى ساتتەردىڭ ءارقايسىسىنىڭ ارتىندا تۇرعان اداممەن. وسىنىڭ ءبارىن سەنىمەن بىرگە وتكىزۋ — قانداي باقىت. ءبىز سەنى شەكسىز جاقسى كورەمىز»، — دەپ جازدى مەسسيدىڭ جۇبايى.
ەسكە سالايىق، اتى اڭىزعا اينالعان فۋتبولشى ليونەل مەسسي قوشتاسۋ حاتىن جاريالاپ، ارگەنتينا قۇراماسىنداعى كارەراسىن اياقتايتىنىن مالىمدەدى.