استانالىق «بارىس» باس باپكەرى ميحايل كراۆەس كونتينەنتالدى حوككەي ليگاسىنىڭ (كحل) تۇراقتى چەمپيوناتىنداعى ۋفانىڭ «سالاۆات يۋلاەۆ» كومانداسىن جەڭگەن جارقىن ويىننىڭ قورىتىندىسىن شىعاردى. «بارىس ارەنادا» وتكەن كەزدەسۋ قوجايىنداردىڭ پايداسىنا 8:6 ەسەبىمەن اياقتالدى. بۇل — ماۋسىمنىڭ باسىنداعى قاتارىنان ەكىنشى جەڭىس، دەپ حابارلايدى infohub.kz سايتى.
ماچ باستالار الدىندا كاسىبي مانسابىن اياقتاعان رومان ستارچەنكونى قۇرمەتتەۋ سالتاناتتى ءراسىمى ءوتتى. ارەنا كۇمبەزىنە «بارىس» پەن قازاقستان قۇراماسىنىڭ كوپ جىلعى كاپيتانىنىڭ تەگى مەن 48 ءنومىرى جازىلعان تۋ كوتەرىلدى.
ويىننان كەيىن ميحايل كراۆەس كوماندانى جەڭىسپەن قۇتتىقتاپ، استانالىقتار 4:1 ەسەبىمەن ۇتقان ءبىرىنشى كەزەڭدى ەرەكشە اتاپ ءوتتى. «بارلىعىن جەڭىسپەن قۇتتىقتايمىن، جاقسى كوماندانى ۇتتىق. كورەرمەن كوپ بولدى، كورەرمەن ءۇشىن جاقسى ويىن بولدى. ال ءبىز ءۇشىن ەكى ۇپاي... قالعانىن كەيىن ۆيدەو قاراپ، ويىندى تالدايمىز»، — دەپ كەلتىرەدى باپكەردىڭ ءسوزىن كلۋبتىڭ ءباسپاسوز قىزمەتى.
مامان بۇكىل ماچ بويى كومانداسىنىڭ ءدال وسىلاي ويناعانىن قالايتىنىن جەتكىزدى. «ءبىزدىڭ ءبىرىنشى كەزەڭدەگىدەي ويناعانىمىزدى قالايمىن، سوندا ءبارى بولدى. باقىلاۋ بولدى، مومەنتتەر بولدى، ءبىز ءوز جۇمىسىمىزدى دۇرىس ورىندادىق».
4:1 ەسەبىنەن كەيىن «سالاۆات يۋلاەۆ» الشاقتىقتى ەكى رەت ازايتتى: الدىمەن 4:3-كە دەيىن، ال ءۇشىنشى كەزەڭدە 7:5 ەسەبىمەن قوجايىندارعا جاقىندادى. سوڭىندا كوماندالار ەكەۋارا 14 شايبا سوعىپ، فينالدىق سيرەنا «بارىستىڭ» 8:6 ەسەبىمەن جەڭىسىن بەكىتتى.
كراۆەس كوماندانىڭ تەك شابۋىلداعى ارەكەتىنە عانا ەمەس، ريزا بولدى. ونىڭ ايتۋىنشا، استانالىقتاردىڭ قاتەلىكتەرى كوبىنەسە قۇرامنىڭ جاس بولۋىنا بايلانىستى. «شابۋىلدا — سۋپەر. تاعى دا ايتامىن، تەك شابۋىلدا ەمەس، قورعانىستا دا سۋپەر بولدى. اسىرەسە ءبىرىنشى كەزەڭ. جىگىتتەردىڭ ءجۇز پايىزعا بەرىلۋى ماعان ۇنايدى. قاتەلىكتەر — جاسقا بايلانىستى. ءبىز قايتادان تالداپ، قاراپ، جويامىز. بەرىلۋى، قوزعالىسى جانە جەڭۋگە دەگەن قۇلشىنىسى بويىنشا ءبارى جاقسى».
گولداردىڭ كوپتىگىنەن ماچ جۇلدىزدار ويىنىن ەسكە تۇسىرگەنى تۋرالى ەسكەرتۋگە باپكەر ستارچەنكونى قۇرمەتتەۋ راسىمىنە بايلانىستى جاۋاپ بەردى. «ءبىز بۇگىن جۇلدىزدى شىعارىپ سالدىق، سوندىقتان جۇلدىزدارشا وينادىق. بۇل جەردە الاڭدايتىن ەشتەڭە جوق، كەلەسى ويىنعا دايىندالۋ كەرەك».
«بارىس» ماۋسىمدى ەكى ۇيدەگى جەڭىسپەن باستادى. ءبىرىنشى تۋردا كراۆەس كومانداسى ءنوۆوسىبىردىڭ «ءسىبىرىن» 7:1 ەسەبىمەن تاس-تالقان ەتسە، ەندى «سالاۆات يۋلاەۆقا» سەگىز شايبا سوقتى. وسىلايشا، العاشقى ەكى ماچتا استانالىقتار 15 گول سوقتى.
باس باپكەر ءساتتى ستارتتان كەيىن كوماندا شوعىرلانۋدى جوعالتپاۋى كەرەكتىگىن اتاپ ءوتتى. «بىزدە ازداپ ءۇزىلىس بار. ەڭ باستىسى — دەمالۋ، قالپىنا كەلۋ، كەلەسى ويىنعا سەرگەك باس پەن ەنەرگيا. بۇگىن چەمپيونات اياقتالمايدى، ءارى قاراي ويناۋ كەرەك. سوندىقتان دەمالامىز، جاتتىعامىز جانە دايىندالامىز».
«بارىستىڭ» كەلەسى ماچى دا ۇيدە وتەدى — 12 قىركۇيەكتە حاباروۆسكىنىڭ «امۋرىنا» قارسى. ودان كەيىن استانالىقتار قوناقتىق سەرياعا اتتانادى.