قازاقستاندا تۇرعىن ءۇيدى تابيعي اپاتتاردان مىندەتتى ساقتاندىرۋ ەنگىزىلمەك. جىلدىق جارنا 2 مىڭنان 20 مىڭ تەڭگەگە دەيىن، ال ساقتاندىرۋ جاعدايى كەزىندە تولەم جارنادان 500 ەسە كوپ بولادى، دەپ حابارلايدى infohub.kz سايتى.
«ساقتاندىرۋ نارىعىن 2030 جىلعا دەيىن دامىتۋ باعدارلاماسى» اياسىندا ازاماتتاردىڭ تىركەلگەن تۇرعىن ءۇيىن جەر سىلكىنىسىنەن، سۋ تاسقىنىنان (سەلدەن) جانە ورمان ورتىنەن مىندەتتى ساقتاندىرۋدى ەنگىزۋ ۇسىنىلۋدا. ءتيىستى وزگەرىستەر ق ر قارجى نارىعىن رەتتەۋ جانە دامىتۋ اگەنتتىگى (ق ر قنردا) ازىرلەگەن باعدارلاما جوباسىندا قامتىلعان. پوليس ازاماتتارعا ەڭ جويقىن تابيعي اپاتتار كەزىندە كەپىلدى قارجىلىق قولداۋ كورسەتۋگە ارنالعان. سالىستىرۋ ءۇشىن: ءقازىر ءىرى تابيعي اپاتتاردان كەيىن تۇرعىن ءۇيدى قالپىنا كەلتىرۋ نەگىزىنەن بيۋدجەت نەمەسە ازاماتتاردىڭ جەكە قاراجاتى ەسەبىنەن جۇزەگە اسىرىلادى. بۇل رەتتە اپاتتىق تاۋەكەلدەر اۋقىمى مەن شىعىنداردىڭ جوعارى شوعىرلانۋىمەن ەرەكشەلەنەدى، سوندىقتان ۇجىمدىق ساقتاندىرۋ مەن قايتا ساقتاندىرۋدى قاجەت ەتەدى.
«تۇركيا، يسپانيا جانە فرانسيانىڭ حالىقارالىق تاجىريبەسىن ەسكەرە وتىرىپ، اپات ءقاۋپى جوعارى ايماقتاردا جۇيەنى كەزەڭ-كەزەڭىمەن ەنگىزۋ ۇسىنىلادى. ءبىرىنشى كەزەڭدە ول ءۇش ايماقتا پيلوتتىق رەجيمدە ىسكە قوسىلادى، سودان كەيىن ونى ەلدىڭ 16 ايماعىنا تاراتۋ جوسپارلانۋدا»، – دەپ اتاپ ءوتتى ق ر قنردا.
دەرەككوزدە اتاپ وتىلگەندەي، جىلدىق ساقتاندىرۋ جارناسىن حالىق ءۇشىن قولجەتىمدى دەڭگەيدە بەلگىلەۋ جوسپارلانۋدا – ناقتى ايماقتاعى تاۋەكەل دەڭگەيىنە بايلانىستى شامامەن جىلىنا 2 مىڭنان 20 مىڭ تەڭگەگە دەيىن. ساقتاندىرۋ جاعدايى باستالعان كەزدە تولەم تولەنگەن جارنانىڭ 500 ەسەلەنگەن مولشەرىن قۇرايدى جانە وقيعا راستالعاننان كەيىن بەس كۇن ىشىندە جۇزەگە اسىرىلادى. مىسالى، 2 مىڭ تەڭگە جارنا كەزىندە تولەم 1 ملن تەڭگەنى، 20 مىڭ تەڭگە جارنا كەزىندە – 10 ملن تەڭگەنى قۇرايدى.
«ءبىرىنشى كەزەڭدە قاراجات زارداپ شەككەندەردىڭ ءبىرىنشى كەزەكتەگى شىعىندارىن جابۋعا ارنالادى. بولاشاقتا قاراجات جيناقتالعان سايىن زاقىمدالعان تۇرعىن ءۇيدى قالپىنا كەلتىرۋگە نەمەسە جاڭا تۇرعىن ءۇي ساتىپ الۋعا مۇمكىندىك بەرەتىن تولەمدەرگە كوشۋ مۇمكىندىگى قاراستىرىلۋدا. جۇيەنىڭ تۇراقتىلىعىن قامتاماسىز ەتۋ ءۇشىن مىندەتتى تۇرعىن ءۇي ساقتاندىرۋ قورى قۇرىلادى. ول مىندەتتى جارنالاردى جينايدى، رەزەرۆتەردى قالىپتاستىرادى، تولەمدەردى ۇيىمداستىرادى جانە اپاتتىق تاۋەكەلدەردى قايتا ساقتاندىرادى»، – دەپ حابارلايدى ق ر قنردا.
سونىمەن قاتار، ەرىكتى جىلجىمايتىن م ۇلىكتى ساقتاندىرۋدىڭ بارلىق شارتتارىنا اپاتتىق تاۋەكەلدەردى قامتۋدى قوسۋ ۇسىنىلادى. ساقتاندىرۋ سىيلىقاقىسىنىڭ ءبىر بولىگىن ساقتاندىرۋ ۇيىمدارى قايتا ساقتاندىرۋ اياسىندا قورعا اۋدارادى. ناتيجەسىندە، ەرىكتى ءپوليسى بار تۇرعىن ءۇي يەسى دە ءوز ساقتاندىرۋ ۇيىمىنىڭ وتەماقىسىنا قوسىمشا قوردان بەلگىلەنگەن تولەمدى الا الادى.
«ءۇش جىلدىق كەيىنگە قالدىرىلعان كەزەڭ قاراستىرىلادى، ونىڭ ىشىندە قور اكسيونەرلىك كاپيتال مەن قايتا ساقتاندىرۋ سىيلىقاقىلارى ەسەبىنەن قاراجات جيناقتايدى. ول اياقتالعاننان كەيىن تۇرعىن ءۇي يەلەرى جىل سايىن مىندەتتى ساقتاندىرۋ جارنالارىن تولەي باستايدى جانە ولاردىڭ تۇرعىن ۇيلەرى تابيعي اپاتتاردان زاقىمدالعان جاعدايدا قور ساقتاندىرۋ تولەمدەرىن جۇزەگە اسىرادى. رەفورما تۇرعىن ءۇيدى تابيعي اپاتتاردان قارجىلىق قورعاۋدىڭ تۇراقتى جۇيەسىن قۇرۋعا، زارداپ شەككەندەرگە كومەك كورسەتۋدى جەدەلدەتۋگە جانە توتەنشە جاعدايلاردىڭ سالدارىن جويۋ كەزىندە مەملەكەتتىك بيۋدجەتكە جۇكتەمەنى ازايتۋعا مۇمكىندىك بەرەدى»، – دەپ اتاپ وتىلگەن دەرەككوزدە.