حالىقارالىق Moody's رەيتينگ اگەنتتىگى قازاقستاننىڭ ەگەمەندى كرەديتتىك رەيتينگىن «Baa1» دەڭگەيىندە «تۇراقتى» بولجاممەن راستادى. بۇل تۋرالى قازاقستان رەسپۋبليكاسىنىڭ ۇلتتىق ەكونوميكا مينيسترلىگى حابارلادى، دەپ جازادى infohub.kz سايتى.
اگەنتتىكتىڭ شەشىمى ەلدىڭ مىقتى فيسكالدىق ۇستانىمىن كورسەتەدى. ونى مەملەكەتتىك قارىزدىڭ تومەن دەڭگەيى، وعان قىزمەت كورسەتۋ قابىلەتىنىڭ جوعارىلىعى جانە جيناقتالعان ۆاليۋتالىق اكتيۆتەر قولداپ وتىر. Moody's باعامى بويىنشا، مۇنىڭ ءبارى قازاقستانعا ەكونوميكالىق ساياساتتا يكەمدىلىك پەن سىرتقى ەكونوميكالىق شوكتاردىڭ سالدارىن جۇمسارتۋعا بەرىك قور بەرەدى.
مۇناي ءوندىرۋ ازايعانىنا قاراماستان، ەل ەكونوميكاسى ءوسۋىن جالعاستىرىپ وتىر. وڭدەۋ ونەركاسىبى، قۇرىلىس، كولىك جانە باسقا دا مۇنايعا قاتىسى جوق سەكتورلار ءوسىمنىڭ قوزعاۋشى كۇشىنە اينالدى.
Moody's سيفرلىق، كولىك جانە ەنەرگەتيكالىق ينفراقۇرىلىمعا سالىناتىن ينۆەستيسيالار ورتا مەرزىمدى ەكونوميكالىق ءوسۋدى قولداپ، ەكونوميكا قۇرىلىمىنىڭ كۇردەلىلىگىن ارتتىرا بەرەتىنىن كۇتەدى. اگەنتتىكتىڭ بولجامىنشا، ءوسۋدىڭ نەگىزگى درايۆەرلەرى شيكىزاتتىق ەمەس سالالار بولىپ قالا بەرەدى.
اگەنتتىك سونداي-اق سالىق رەفورمالارى بيۋدجەتتىڭ مۇنايعا قاتىسى جوق كىرىس بازاسىن كەڭەيتۋ ارقىلى فيسكالدىق تۇراقتىلىقتى نىعايتادى دەپ ەسەپتەيدى. ەكونوميكانى ودان ءارى ءارتاراپتاندىرۋ سالىق رەفورماسىمەن جانە ينفراقۇرىلىمدىق ينۆەستيسيالارمەن قاتار، Moody's باعامى بويىنشا، فيسكالدىق پەرسپەكتيۆالار مەن ەكونوميكالىق ءوسۋ مۇمكىندىكتەرىن جاقسارتادى.
بۇعان دەيىن «كۋرسيۆ» S&P Global Ratings قازاقستاننىڭ بانك جۇيەسىنىڭ سالالىق باعاسىن «7»-دەن «6»-عا كوتەرىپ، «ەكونوميكالىق تاۋەكەل» كومپونەنتى بويىنشا بولجامدى «تۇراقتىدان» «پوزيتيۆكە» وزگەرتكەنىن جازعان. قايتا قاراۋدان كەيىن بانك سەنتركرەديتتىڭ ۇزاق مەرزىمدى رەيتينگى «BB+»-كە دەيىن ءوسىپ، Halyk Bank، نۇربانك جانە Freedom رەيتينگتەرى بويىنشا بولجامدار ءپوزيتيۆتى بولدى.