قازاقستان پرەزيدەنتى قاسىم-جومارت توقايەۆ پەداگوگتەردى اتتەستاسيالاۋ تالاپتارىن قايتا قاراۋدى تاپسىردى، دەپ حابارلايدى infohub.kz سايتى.
استانادا وتكەن رەسپۋبليكالىق تامىز كونفەرەنسياسىندا مەملەكەت باسشىسى پەداگوگتەردەن قولدانىستاعى ەرەجەلەرگە قاتىستى كوپتەگەن ءوتىنىش تۇسەتىنىن اتاپ ءوتتى. ول جۇيەنى تۇسىنىكتى ءارى اشىق ەتۋ كەرەكتىگىن، الايدا مۇعالىمدەردىڭ بىلىكتىلىگىن باعالاۋدان باس تارتۋ جوسپارلانبايتىنىن جەتكىزدى.
«مەن پەداگوگتەردى اتتەستاسيالاۋ تالاپتارىن وڭتايلاندىرۋ جانە جەتىلدىرۋ تۋرالى ناقتى تاپسىرما بەردىم. بۇل جەردە باعالاۋدان تولىق باس تارتۋ نەمەسە ونى قيىنداتۋ تۋرالى ءسوز جوق. ءبىلىمدى ءادىل باعالاۋ — ءبىلىم بەرۋ جۇيەسىنىڭ نەگىزى. بىزگە بارىنشا تۇسىنىكتى ءارى اشىق جۇيە قاجەت»، — دەدى توقايەۆ.
ەندى سالالىق مينيسترلىك بۇل ماسەلەنى پىسىقتاپ، جاقىن ارادا ءوز ۇسىنىستارىن ۇسىنۋى ءتيىس.
كونفەرەنسيادا پرەزيدەنت بولاشاق مۇعالىمدەردى دايارلاۋ ماسەلەسىن دە قوزعادى. قازىرگى ۋاقىتتا پەداگوگتەردى مەكتەپتەر مەن بالاباقشالارداعى جۇمىسقا تىكەلەي دايارلاۋعا مۇمكىندىك بەرەتىن ءبىرىڭعاي جۇيە قۇرۋ تالقىلانۋدا. توقايەۆ مۇنداي وزگەرىستەردى ەنگىزگەنگە دەيىن مۇقيات باعالاۋعا شاقىردى.
«رەفورما — بۇل العاشقى سىناق نەمەسە ەكسپەريمەنت ەمەس. بۇل جاۋاپتى شەشىم جانە شارالار كەشەنى. ۇكىمەت پەداگوگيكالىق جوعارى وقۋ ورىندارىنىڭ قىزمەتىن قايتا قاراۋ كەزىندە بۇل ماسەلەنى مىندەتتى تۇردە ەسكەرۋى كەرەك»، — دەدى ول.
پرەزيدەنت «ورلەۋ» بىلىكتىلىكتى ارتتىرۋ ورتالىعىنا جەكە توقتالدى. ونىڭ قازىرگى جۇمىسىن توقايەۆ سىنعا الدى.
«وزدەرىڭىزگە بەلگىلى، مۇعالىمدەرگە كاسىبي قولداۋ كورسەتۋ ءۇشىن «ورلەۋ» بىلىكتىلىكتى ارتتىرۋ ورتالىعى قۇرىلعان بولاتىن. الايدا بۇگىندە بۇل ۇيىمنىڭ جۇمىسىن قاناعاتتانارلىق دەپ اتاۋ قيىن»، — دەدى پرەزيدەنت.
ونىڭ ايتۋىنشا، پەداگوگتەردىڭ جاڭا بۋىنىن دايارلاۋعا تەك سالالىق ۆەدومستۆولار عانا ەمەس، سونىمەن قاتار ادىستەمەلىك ورتالىقتار، مەكتەپكە دەيىنگى، ورتا جانە قوسىمشا ءبىلىم بەرۋ مەكەمەلەرى دە قاتىسۋى ءتيىس.
توقايەۆ سونىمەن قاتار بىلىكتىلىكتى ارتتىرۋ باعدارلامالارىنا جاڭا كونستيتۋسيانىڭ قۇندىلىقتارىن، «زاڭ جانە ءتارتىپ» قاعيداتتارىن، سونداي-اق «ادال ازامات» جانە «تازا قازاقستان» يدەيالارىن ەنگىزۋدى تاپسىردى.