مۇگەدەكتىگى بار 26 مىڭعا جۋىق قازاقستاندىقتىڭ 48 ملرد تەڭگە كولەمىندە پروبلەمالىق نەسيەسى بار. قارىز جۇكتەمەسىن ازايتۋ ءۇشىن ققرا جاڭا شارالاردى ۇسىنىپ وتىر، دەپ حابارلايدى infohub.kz سايتى.
قازاقستاندا I جانە II توپ مۇگەدەكتىگى بار ادامداردىڭ بەرەشەگىمەن جۇمىس ىستەۋ ءتاسىلى وزگەرۋدە. بارلىعىنا بىردەي شەشىم قولدانۋدىڭ ورنىنا، ءاربىر قارىز الۋشىنىڭ جاعدايى جەكە قاراستىرىلادى — تابىسى، م ۇلىكتىك جاعدايى، وتباسى قۇرامى جانە باسقا دا ومىرلىك ءمان-جايلار ەسكەرىلە وتىرىپ.
ققرا دەرەگىنشە، ءقازىر I جانە II توپ مۇگەدەكتىگى بار 105،6 مىڭنان استام قازاقستاندىقتىڭ جالپى سوماسى 262 ملرد تەڭگە بولاتىن نەسيەسى بار. ونىڭ ىشىندە 26،3 مىڭ ادامنىڭ 48 ملرد تەڭگە كولەمىندە پروبلەمالىق بەرەشەگى بار. الماتىدا مۇگەدەكتىگى بار شامامەن 10 مىڭ ادام نەسيەنى وتەۋدە قيىندىق كورۋدە، ولاردىڭ جالپى قارىزى 8،6 ملرد تەڭگەنى قۇرايدى.
وسى ساناتتاعى ازاماتتار ءۇشىن ققرا الماتى اكىمدىگىمەن، ەڭبەك جانە حالىقتى الەۋمەتتىك قورعاۋ مينيسترلىگىمەن جانە ادىلەت مينيسترلىگىمەن بىرلەسىپ، بەرەشەكتى كەشەندى رەتتەۋ بويىنشا پيلوتتىق جوبانى ىسكە اسىرۋدا.
قارىز الۋشىلارعا قارىزدى قايتا قۇرىلىمداۋ، قارىز جۇكتەمەسىن ازايتۋ، تولەمدەردى كەيىنگە قالدىرۋ، نەسيە مەرزىمىن ۇزارتۋ نەمەسە جاڭا وتەۋ كەستەسى ۇسىنىلۋى مۇمكىن. ەگەر تولەم قابىلەتىن قالپىنا كەلتىرۋ مۇمكىن بولماسا، ازاماتتارعا بانكروتتىق راسىمىنەن ءوتۋ ءتارتىبى تۇسىندىرىلەدى.
«بۇل بەرەشەكتى جالپاي كەشىرۋ ەمەس، كەرىسىنشە، ازاماتتىڭ تولەم قابىلەتىن قالپىنا كەلتىرىپ، مىندەتتەمەلەرىن قولايلى شارتتارمەن ورىنداۋىنا جاعداي جاساۋ»، — دەپ اتاپ ءوتتى ققرا-نىڭ الەۋمەتتىك جوبالار جانە قارجىلىق ساۋاتتىلىقتى ارتتىرۋ دەپارتامەنتىنىڭ ديرەكتورى الەكساندر تەرەنتيەۆ.
2026 جىلدىڭ 1 شىلدەسىنەن باستاپ finkelisim.kz سيفرلىق پلاتفورماسى جۇمىس ىستەيدى، ول ارقىلى بىرنەشە نەسيەسى بار قارىز الۋشىلار بەرەشەكتى رەتتەۋگە ءبىر ءوتىنىش بەرە الادى. قىزمەتتى ەكى جانە ودان دا كوپ نەسيەگەر الدىندا 90 كۇننەن استام مەرزىمى وتكەن، قارىز سوماسى 648 مىڭ تەڭگەدەن 6،9 ملن تەڭگەگە دەيىن بولاتىن ازاماتتار پايدالانا الادى.
الەۋمەتتىك وسال ساناتتار ءۇشىن جەڭىلدەتىلگەن وتەۋ شارتتارى قاراستىرىلعان — اي سايىنعى تولەمدەردىڭ تومەندەۋى جانە تولەم مەرزىمدەرىنىڭ ۇزارۋى. ءبىرىنشى كەزەڭدە پلاتفورمانىڭ الەۋەتتى قاتىسۋشىلارى شامامەن 350 مىڭ پروبلەمالىق قارىز الۋشى بولۋى مۇمكىن.
2027 جىلدىڭ 1 قاڭتارىنان باستاپ قارجى ومبۋدسمەنىنىڭ جۇمىسىنىڭ جاڭا ەرەجەلەرى كۇشىنە ەنەدى، ال بولاشاقتا بارلىق كومەك مەحانيزمدەرىن ءبىرىڭعاي بەرەشەكتى رەتتەۋ ورتالىعىندا بىرىكتىرۋ جوسپارلانۋدا.
بۇعان دەيىن «كۋرسيۆ» ققرا بانكتەر، ميكروقارجى جانە ساقتاندىرۋ ۇيىمدارى كليەنتكە ۇسىنىلاتىن نەسيە نەمەسە وزگە دە ءونىمنىڭ وعان شىنىمەن سايكەس كەلەتىنىنە كوز جەتكىزۋگە مىندەتتى بولاتىن جاڭا ەرەجەلەردى بەكىتكەنى تۋرالى جازعان بولاتىن.