Brent ماركالى مۇناي باررەلى 103 دوللاردان قىمبات باعامەن ساۋدالانىپ جاتىر. وسى جاعدايدا الەمنىڭ بىرنەشە ورتالىق بانكى ەنەرگيا تاسىمالداۋشىلاردىڭ قىمباتتاۋىنان تۋىندايتىن ينفلياسيانى تەجەۋ ءۇشىن اقشا-كرەديت ساياساتىن قاتاڭداتۋعا بەل بۋدى. ال قازاقستان، كەرىسىنشە، بازالىق مولشەرلەمەنى تومەندەتۋدى جالعاستىرىپ وتىر، دەپ حابارلايدى infohub.kz سايتى.
كوپتەگەن ەل ءۇشىن قىمبات مۇناي — بيۋدجەتكە قوسىمشا تابىس پەن ۆاليۋتا اعىنىنىڭ كوزى ەمەس، كەرىسىنشە، تاۋارلار مەن قىزمەتتەر باعاسىنىڭ وسۋىنە اكەلەتىن قوسىمشا شىعىس بابى. Investing.com دەرەگىنشە، ءقازىر Brent ماركالى مۇناي باررەلى 103 دوللاردان قىمبات تۇر.
وسى جاعدايدا ءبىرقاتار ورتالىق بانك بازالىق مولشەرلەمەلەرىن كوتەرۋگە شەشىم قابىلدادى. ەۋروپالىق ورتالىق بانك (ەۋرووداق) 10 قىركۇيەكتە ءۇش نەگىزگى مولشەرلەمەنى 0،25 پايىزدىق تارماققا كوتەردى. فەدەرالدىق رەزەرۆ جۇيەسى (اقش) 16 قىركۇيەكتە فەدەرالدىق قورلار بويىنشا ماقساتتى دياپازوندى 0،25 پ.ت. ۇلعايتىپ، 3،75–4%-عا جەتكىزدى. انگليا بانكى 17 قىركۇيەكتە بازالىق مولشەرلەمەنى بۇرىنعى دەڭگەيدە قالدىرۋدى ءجون كوردى، الايدا كوميتەتتەگى داۋىستار ەكىگە جارىلدى: توعىز قاتىسۋشىنىڭ ۇشەۋى ەكىنشى رەتتىك ينفلياسيا قاۋپىنە بايلانىستى مولشەرلەمەنى دەرەۋ 4%-عا كوتەرۋدى تالاپ ەتتى. جاپونيا بانكى 18 قىركۇيەكتە مولشەرلەمەنى 0،25 پ.ت. كوتەرىپ، 1،25%-عا جەتكىزدى.
بارلىق جاعدايدا ورتالىق بانكتەر ءوز شەشىمدەرىن قىمبات مۇنايدان تۋىندايتىن ەكىنشى رەتتىك ينفلياسيالىق اسەرلەر قاۋپىمەن ءتۇسىندىردى. مۇناي باعاسى 100 دوللاردان جوعارى تۇرعاندا بەنزين مەن ديزەلدىڭ قىمباتتاۋى تاسىمالداۋ قۇنىنا، ودان كەيىن ازىق-ت ۇلىك پەن تۇتىنۋ تاۋارلارىنىڭ باعاسىنا تەز اۋىسادى.
ال قازاقستاندا كەرىسىنشە جاعداي بايقالادى. ق ر ۇلتتىق بانكى بازالىق مولشەرلەمەنى جۇيەلى تۇردە تومەندەتىپ كەلەدى. 2026 جىلدىڭ باسىندا ول رەكوردتىق 18% بولسا، ماۋسىمدا 17%-عا، كەيىن 16،75%-عا، 16،5%-عا، قىركۇيەكتە 16،25%-عا دەيىن تومەندەدى.
سەبەبى قىمبات ەنەرگيا تاسىمالداۋشىلار ەلگە قوسىمشا شەتەل ۆاليۋتاسىنىڭ اعىنىن قامتاماسىز ەتىپ، بيۋدجەتتى نىعايتادى جانە تەڭگە باعامىن قولدايدى. ىشكى ينفلياسيانىڭ باياۋلاۋىمەن (تامىز قورىتىندىسى بويىنشا 9،8%) قاتار بۇل ۇلتتىق بانككە ەلدەگى اقشا-كرەديت ساياساتىن جەڭىلدەتۋگە مۇمكىندىك بەرەدى.
ەسكە سالايىق، 2026 جىلعا ارنالعان بيۋدجەتتى قۇرۋ كەزىندە قازاقستان مۇناي باعاسىن 60 دوللار شاماسىندا بەلگىلەگەن. ال بازالىق مولشەرلەمەنىڭ تومەندەۋى قازاقستاندىقتارعا قالاي اسەر ەتەتىنى تۋرالى ءبىز مۇندا تولىق ايتقانبىز.