قازاقستاننىڭ مۇناي-گاز سالاسىنان شەتەلدىك ينۆەستيسيالاردىڭ تازا اعىنى ەكىنشى توقساندا 1،5 ملرد دوللاردى قۇرادى — بۇل ەل تاۋەلسىزدىك العاننان بەرگى ەڭ تومەن كورسەتكىش. وسىلاي دەپ سالالىق ساراپشى ولجاس ءبايدىلدينوۆ مالىمدەدى. ونىڭ ايتۋىنشا، رەسپۋبليكا مۇناي وندىرۋگە سالىناتىن قارجىنى قىسقارتۋ كەزەڭىنە اياق باستى، دەپ حابارلايدى infohub.kz سايتى.
ۇلتتىق بانكتىڭ ەكونوميكا سالالارى بويىنشا تىكەلەي شەتەلدىك ينۆەستيسيالاردىڭ جالپى اعىنى تۋرالى دەرەكتەرىنە سايكەس، مۇناي مەن گاز ءوندىرۋ كاپيتالدىڭ تازا اعىنى ەڭ كوپ سالاعا اينالدى — بۇل توقساندا دا، جارتىجىلدىقتا دا بايقالدى. 2026 جىلدىڭ ەكىنشى توقسانىندا مۇناي-گاز سەكتورىنان 1،5 ملرد دوللار شىعىپ كەتسە، ءبىرىنشى جارتىجىلدىقتا 349 ملن دوللار كەتكەن.
بۇل كورسەتكىش مۇناي-گاز كەن ورىندارىن ءوندىرۋ مەن بارلاۋعا سالىنعان قاراجات پەن پايدا مەن ديۆيدەند تۇرىندە ەلدەن شىعارىلعان كاپيتالدىڭ ايىرماسىن بىلدىرەدى.
ولجاس ءبايدىلدينوۆ ءوز ارناسىندا توقساندىق –1،5 ملرد دوللار ناتيجەسىن قازاقستان تاۋەلسىزدىك العاننان بەرگى انتيرەكورد دەپ اتادى. ساراپشى مۇناي سالاسىنا ينۆەستيسيانىڭ ازايۋىنا اسەر ەتكەن فاكتورلاردىڭ قاتارىندا قولدانىستاعى كەن ورىندارىنىڭ سارقىلۋىن، جاڭا كەن ورىندارىنىڭ جوقتىعىن جانە نارىقتىڭ شامادان تىس رەتتەلۋىن اتاپ ءوتتى.
«ديۆيدەند تولەۋدە جامان ەشتەڭە جوق: پايدا تابۋ — كاپيتاليزمنىڭ نەگىزى. ءبىز تەك مۇناي ءوندىرۋ تومەندەيتىن كەزەڭگە اياق باستىق. مۇناي كەشىندەگى مۋزىكا ءالى باسىلعان جوق، ءبىراق بىرتىندەپ تىنا باستادى»، — دەدى ءبايدىلدينوۆ.
ساراپشىنىڭ باعامى بويىنشا، قازاقستان 2030 جىلدارعا دەيىن قازىرگى ءوندىرۋ كولەمىن — تاۋلىگىنە شامامەن 2 ملن باررەل دەڭگەيىندە ساقتاي الادى. الايدا 2040 جىلعا قاراي مۇناي ءتىپتى ىشكى وڭدەۋگە دە جەتپەي قالۋى مۇمكىن، ال 2050 جىلدارى ءوندىرۋ مۇلدەم توقتايدى.
بۇعان دەيىن ساراپشى 2050 جىلعا قاراي قازاقستاندا مۇناي ءوندىرۋ 2000 جىلداردىڭ باسىنداعى دەڭگەيگە دەيىن تومەندەيتىنىن بولجاعان — 2025 جىلعى 96 ملن توننادان 2050 جىلى 38 ملن تونناعا دەيىن. وسى جاعدايدا ەلدىڭ مۇنايدان تۇسەتىن كىرىسى دە 2025 جىلدان باستاپ ازايا باستايدى.