14 جىلدان استام ۋاقىتقا سوزىلعان مۇرا داۋى قايتىس بولعان ازاماتتىڭ قىزىنىڭ تالاپ-ارىزىن قاناعاتتاندىرماۋمەن اياقتالدى. ازاماتتىق ىستەر جونىندەگى كاسساسيالىق سوت ايەل مەن ونىڭ اجەسى اراسىنداعى جانجالدى قارادى. اجەسى ۇلى قايتىس بولعاننان كەيىن مۇرانى راسىمدەگەن، دەپ حابارلايدى infohub.kz سايتى.
«كاسساسيالىق سوتتاردىڭ وزەكتى جاڭالىقتارى» Telegram-ارناسىنىڭ مالىمەتىنشە، 2011 جىلى ەر ادام قايتىس بولعاننان كەيىن ونىڭ اناسى شىمكەنتتەگى تۇرعىن ءۇي مەن جەر تەلىمىنە مۇراگەرلىك قۇقىعى تۋرالى كۋالىك العان. كەيىن بۇل م ۇلىكتىڭ ءبىر بولىگى باسقا مۇراگەرگە وسيەت ەتىلگەن.
14 جىلدان كەيىن قايتىس بولعان ازاماتتىڭ قىزى سوتقا جۇگىنىپ، ونى مۇراگەرلەر قاتارىنا قوسپاعانىن ايتقان. وسىعان بايلانىستى ول مۇراگەرلىك قۇقىعى تۋرالى كۋالىك پەن وسيەتتى جارامسىز دەپ تانۋدى سۇراعان.
ءبىرىنشى جانە اپەللياسيالىق ساتىداعى سوتتار ونىڭ دالەلدەرىمەن كەلىسىپ، تالاپ-ارىزدى قاناعاتتاندىرعان. الايدا كاسساسيالىق ساتى باسقا قورىتىندىعا كەلگەن.
زاڭ بويىنشا مۇرانى مۇرا قالدىرۋشى قايتىس بولعان كۇننەن باستاپ التى اي ىشىندە قابىلداۋ قاجەت. ەگەر بۇل مەرزىم وتكىزىلىپ الىنسا، ونى تەك سوت ارقىلى جانە تەك ەرەكشە جاعدايلاردا، دالەلدى سەبەپتەر بولعان كەزدە قالپىنا كەلتىرۋگە بولادى.
ءىس قۇجاتتارىنا سايكەس، مۇرا قالدىرۋشىنىڭ قىزى 14 جىل بويى مۇرانى قابىلداۋ ءۇشىن ەشقانداي ارەكەت جاساماعان، وتكىزىلگەن مەرزىمدى قالپىنا كەلتىرۋدى سۇراماعان جانە مۇراگەرلىك ۇيدە تۇرىپ، مۇرانى ءىس جۇزىندە قابىلداعانىن دالەلدەمەگەن.
تالاپكەر مەرزىمنىڭ ءوتۋىن اكەسى قايتىس بولعان كەزدە كامەلەتكە تولماعانىمەن جانە اتا-اناسىنىڭ اجىراسقانىمەن تۇسىندىرگەن. الايدا كاسساسيالىق سوت مۇنداي جاعدايلاردا بالانىڭ مۇددەسىن ونىڭ زاڭدى وكىلدەرى قورعايتىنىن اتاپ وتكەن. اناسىنىڭ مۇنى ىستەي الماعانىن نەمەسە اتا-انا قۇقىعىنان شەكتەلگەنىن، سونداي-اق مەرزىمنىڭ وتۋىنە باسقا دا دالەلدى سەبەپتەردىڭ بولعانىن راستايتىن دالەلدەر ۇسىنىلماعان.
سوت مۇراگەرلىك قۇقىقتاردىڭ راسىمدەلمەۋىن باسقا مۇراگەرلىك كۋالىكتەردى نەمەسە وسيەتتى جارامسىز دەپ تانۋ تالابىمەن الماستىرۋعا بولمايدى دەگەن قورىتىندىعا كەلگەن. ناتيجەسىندە كاسساسيالىق سوت بۇرىن قابىلدانعان سوت اكتىلەرىن جويىپ، تالاپتاردى قاناعاتتاندىرۋدان باس تارتقان.