«باۆاريانىڭ» باس باپكەرى ۆەنسان كومپاني دجەمال مۋسيالانىڭ نەۆرولوگيالىق ماسەلەسىنە بايلانىستى دارى-دارمەگىن وزگەرتكەننەن كەيىن قايتا ورالۋعا تىرىسىپ جاتقانىن حابارلادى. 23 جاستاعى جارتىلاي قورعاۋشى وسى ايدا وتكەن جولداستىق كەزدەسۋلەردە ەكى رەت ەسىنەن تانىپ قالعان بولاتىن، سوندىقتان ول جۇما كۇنى «شتۋتگارتقا» قارسى بۋندەسليگانىڭ اشىلۋ ويىنىنا قاتىسپايدى. دەگەنمەن، كومپانيدىڭ ايتۋىنشا، ول بەيسەنبىدە كوماندامەن تولىق جاتتىعۋعا قاتىسادى.
«بۇل ونىڭ دارى-دارمەكتىڭ ارتۋىنا ۇيرەنىپ جاتقانىن جانە وعان جاقسى جاۋاپ بەرەتىنىن بىلدىرەدى. ول ءبىر كەزدەرى قايتادان قۇرامعا قوسىلادى جانە قالىپتى وينايدى، ءبىراق ءبىز بۇل شەشىمدى بارلىق مەديسينالىق ماماندارمەن بىرگە قابىلدايمىز. ونىڭ جاعدايى جاقسى»، — دەدى كومپاني.
مۋسيالا 15 تامىزدا «لەيپسيگكە» قارسى جولداستىق ويىندا، ال ءۇش كۇننەن كەيىن «حايدەنحايمعا» قارسى كەزدەسۋدە ەسىنەن تانىپ قالعان ەدى. كەيىن ول «نەۆرولوگيالىق ديسفۋنكسيادان تۋىنداعان ابسانس ۇستامالارى» دياگنوزى قويىلعانىن، ءبىراق «قوسىمشا دەنساۋلىققا ءقاۋىپ جوقتىعىن» جانە بۇرىنعىداي ويناۋدى جالعاستىرۋدى جوسپارلاپ وتىرعانىن ايتتى.
كومپاني مەن «باۆاريانىڭ» سپورت جونىندەگى ديرەكتورى ماكس ەبەرل 21 تامىزدا كلۋبتىڭ مۋسيالانىڭ جاعدايى تۋرالى وتكەن ماۋسىمنان بەرى بىلەتىنىن جانە ويىنشىنىڭ دارى-دارمەگىن وزگەرتۋ الاڭداعى وقيعالاردى تۋدىرعانىن مالىمدەدى. «قازىرگى مىندەت — دارى-دارمەكتى قايتا رەتتەۋ، ول بۇرىنعى قالپىنا، ياعني ۇستاماسىز وتكەن ۇزاق كەزەڭگە ورالۋى ءۇشىن»، — دەدى ەبەرل.
«باۆاريا» بۋندەسليگاداعى چەمپيوندىق اتاعىن قورعاۋدى جۇما كۇنى «شتۋتگارتقا» قارسى ءوز الاڭىندا باستايدى.