ميۋنحەننىڭ جەر سوتى جاساندى ينتەللەكتتى وقىتۋ ءتاسىلىن تۇبەگەيلى وزگەرتە الاتىن شەشىم شىعاردى. سوت ليسەنزيالاۋ اگەنتتىگى GEMA-نىڭ تانىمال مۋزىكا گەنەراتورىن جاساعان Suno كومپانياسىمەن داۋىندا GEMA-نىڭ پايداسىنا شەشتى. بۇل الەمدىك تاجىريبەدەگى العاشقى وسىنداي پرەسەدەنت، دەپ حابارلايدى infohub.kz سايتى.
وسى ۋاقىتقا دەيىن جاساندى ينتەللەكت مودەلدەرىن ازىرلەيتىن كومپانيالار ءوز الگوريتمدەرىن وقىتۋ ءۇشىن مۋزىكالىق شىعارمالاردى، ولەڭدەردى جانە باسقا دا زياتكەرلىك ەڭبەك ناتيجەلەرىن تەگىن پايدالانىپ كەلدى. الايدا ميۋنحەندىك سوتتىڭ شەشىمى بۇل تاجىريبەگە نۇكتە قويۋى مۇمكىن.
Suno-عا قارسى تالاپتى نەمىس ۇيىمى GEMA، ياعني مۋزىكالىق شىعارمالاردى ليسەنزيالاۋمەن اينالىساتىن ۇيىم قوزعادى. اگەنتتىك Suno-نىڭ اۆتورلاردىڭ رۇقساتىنسىز جانە ليسەنزيالىق تولەمدەردى تولەمەي-اق اندەردى جاساندى ينتەللەكتتى وقىتۋ ءۇشىن پايدالانعانى ءۇشىن وتەماقى تالاپ ەتتى.
«وسى شەشىممەن GEMA ءوزىنىڭ 100 مىڭنان استام مۇشەسى ءۇشىن عانا ەمەس، بۇكىل الەمدەگى اۆتورلار ءۇشىن ماڭىزدى پرەسەدەنت جاسادى. ەندى ءبىز اقش سياقتى ەلدەردە دە ءوز قۇقىقتارىمىزدى قورعاي الاتىنىمىز شىعارماشىلارعا تەرەڭ تەحنولوگيالىق ترانسفورماسيا كەزەڭىندە ءۇمىت پەن سەنىم ۇيالاتادى»، — دەدى GEMA باسقارما ءتوراعاسى دوكتور رالف ۆايگاند.
سوت Suno-نى ايىپپۇل تولەۋگە مىندەتتەدى، الايدا وتەماقىنىڭ ناقتى سوماسى ازىرگە انىقتالماعان.
بۇعان دەيىن «كۋرسيۆ» امەريكاندىق جاڭالىقتار باسىلىمدارى OpenAI-عا قارسى تالاپ قويىپ، كومپانيانى ChatGPTء-دى وقىتۋ ءۇشىن اۆتورلىق قۇقىقپەن قورعالعان ماتەريالداردى پايدالانعانى ءۇشىن جازالاۋدى تالاپ ەتكەنىن حابارلاعان بولاتىن.