Nazarbayev University الەمدىك ۋنيۆەرسيتەتتەردىڭ Times Higher Education (THE) World University Rankings رەيتينگىندە ەكىنشى جىل قاتارىنان ناتيجەسىن جاقسارتىپ، ەكى جىلدا 200 ساتىعا كوتەرىلدى. ۋنيۆەرسيتەت مالىمەتىنشە، 2024 جىلى ول 501–600 دياپازونىندا بولعان، كەلەسى رەيتينگتىك سيكلدە 401–500-گە كوتەرىلگەن، ال بيىلعى رەيتينگتە 376–400 توبىنا ەنىپ، قازاقستان مەن ورتالىق ازيانىڭ جوعارى وقۋ ورىندارى اراسىندا ءبىرىنشى ورىندى ساقتاپ قالدى، دەپ حابارلايدى infohub.kz سايتى.
THE World University Rankings الەمدەگى ەڭ بەدەلدى ۋنيۆەرسيتەت رەيتينگتەرىنىڭ ءبىرى سانالادى. بيىل وعان 118 ەل مەن ايماقتان رەكوردتىق 2 297 ۋنيۆەرسيتەت ەندى — بۇل وتكەن جىلمەن سالىستىرعاندا 106-عا ارتىق. حالىقارالىق باسەكە كۇشەيىپ جاتقان جاعدايدا Nazarbayev University ەكى جىلدا الەمنىڭ ۇزدىك 23%-نان ۇزدىك 17%-ىنا كوتەرىلدى.
THE ۋنيۆەرسيتەتتەردى بەس باعىت بويىنشا باعالايدى: ءبىلىم ساپاسى، زەرتتەۋ ورتاسى، زەرتتەۋ ساپاسى، حالىقارالىق اشىقتىق جانە يندۋستريامەن ىنتىماقتاستىق. جاڭا رەيتينگتە NU بارلىق دەرلىك باعىت بويىنشا ناتيجەسىن جاقسارتتى. ەڭ كۇشتى كورسەتكىش — زەرتتەۋ ساپاسى. بۇل تۇرعىدا NU-دىڭ ناتيجەسى University of Geneva، University of Arizona جانە University of Rochester-پەن سالىستىرۋعا تۇرارلىق، بۇل ۋنيۆەرسيتەت زەرتتەۋلەرىنىڭ ىقپالى ارتىپ كەلە جاتقانىن كورسەتەدى.
«ەڭ الدىمەن NU قاۋىمداستىعىن جانە بۇكىل قازاقستاندى وسى ناتيجەمەن قۇتتىقتاعىم كەلەدى. قازاقستاندىق ۋنيۆەرسيتەت العاش رەت الەمنىڭ جەتەكشى ۋنيۆەرسيتەت رەيتينگتەرىنىڭ بىرىندە وسىنداي دەڭگەيگە جەتتى. بۇل — تەك ءبىزدىڭ ۋنيۆەرسيتەت ءۇشىن عانا ەمەس، ەلدىڭ جوعارى ءبىلىم جۇيەسى ءۇشىن دە ماڭىزدى جەتىستىك. بۇل ناتيجەنىڭ ارتىندا NU وقىتۋشىلارىنىڭ، زەرتتەۋشىلەرىنىڭ، ستۋدەنتتەرى مەن قىزمەتكەرلەرىنىڭ كوپجىلدىق ەڭبەگى تۇر. ۋنيۆەرسيتەتتىڭ، عىلىم مەن ءبىلىمنىڭ دامۋىنا ءوز ەڭبەگىمەن ۇلەس قوسىپ جۇرگەن اركىمگە العىس ايتامىن»، — دەدى NU پرەزيدەنتى ۆاكار احماد.
NU-دا وقۋعا دەگەن قىزىعۋشىلىق تا ارتىپ كەلەدى. بيىل وقۋعا شامامەن 12 مىڭ ادام ءوتىنىش بەرگەن، ال شەتەلدىك ستۋدەنتتەردى قابىلداۋ ۋنيۆەرسيتەت تاريحىنداعى ەڭ جوعارى كورسەتكىشكە جەتتى. تۇلەكتەردىڭ جۇمىسقا ورنالاسۋ دەڭگەيى جوعارى بولىپ قالىپ وتىر — 95%-دان استام.
بۇل ناتيجەلەر NU-دىڭ اكادەميالىق بەدەلىنىڭ نىعايىپ، قازاقستاندا جانە ودان تىس جەرلەردە ۋنيۆەرسيتەتكە دەگەن سەنىمنىڭ ارتقانىن كورسەتەدى. حالىقارالىق رەيتينگتەردەگى ءوسىم ۋنيۆەرسيتەتتىڭ تۇراقتى دامۋىن جانە جاھاندىق اكادەميالىق قاۋىمداستىقتاعى ءرولىنىڭ ارتىپ كەلە جاتقانىن راستايدى.
اعىمداعى رەيتينگتە قازاقستاندى ون ۋنيۆەرسيتەت تانىستىردى. ولاردىڭ قاتارىندا س. ج. اسفەندياروۆ اتىنداعى قازاق ۇلتتىق مەديسينا ۋنيۆەرسيتەتى (1201–1400)، ءال-فارابي اتىنداعى قازاق ۇلتتىق ۋنيۆەرسيتەتى (1401–1600)، ق. ي. ساتبايەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتى (1401–1600)، ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتى (1601–1800) بار.