بەيسەنبى كۇنى نيگەريانىڭ سولتۇستىك-باتىسىنداعى سوكوتو شتاتىنداعى وزەندە قايىق اۋدارىلىپ، كەمىندە 47 ادام قازا تاپتى. بۇل تۋرالى شەنەۋنىكتەر مەن تۇرعىندار حابارلادى. وقيعا شتاتتىڭ گورونيو اۋداندىق اكىمدىگىنە قاراستى گوراۋ قالاشىعىندا بولدى. قايىقتا جۇمىس ىستەۋ ءۇشىن فەرمالارعا بارا جاتقان ادامدار بولعان.
ۇلتتىق ىشكى سۋ جولدارى باسقارماسىنىڭ سوكوتو شتاتىنداعى مەنەدجەرى ابدۋلكادير ءيۋسۋفتىڭ ايتۋىنشا، قازا تاپقاندار سانى «ازىرگە» 47 ادامدى قۇرايدى. تۇرعىن سامايلا گاربا (55 جاستا) نەمەرەسى 13 جاستاعى دجاميلا ۋسماننىڭ دا قازا تاپقاندار اراسىندا ەكەنىن ايتتى. ول كەمىندە 42 ءمايىتتى ساناعانىن، ولاردىڭ كوبى ايەلدەر مەن بالالار ەكەنىن جەتكىزدى.
«بىلەسىز بە، جاڭبىرلى ماۋسىمدا ايەلدەر مەن بالالاردىڭ كوبى فەرمادا جۇمىس ىستەۋگە بارادى»، — دەدى ول Associated Press اگەنتتىگىنە. تاعى ءبىر تۇرعىن امينۋ دان حادجيا ءوزىنىڭ دە وسى سۋ جولىمەن فەرماعا باراتىنىن جانە سول قايىقتا بولماعانىنا باقىتتى سانايتىنىن ايتتى. «شىنىندا، قاۋىمداعى ءاربىر ءۇي دەرلىك زارداپ شەكتى»، — دەدى ول.
نيگەريادا قايىق اپاتتارى ءجيى بولىپ تۇرادى، اسىرەسە جاڭبىرلى ماۋسىمدا. قاۋىپسىزدىك ەرەجەلەرىنىڭ ساقتالماۋى قۇتقارۋ كەۋدەشەلەرى جوق اقاۋلى قايىقتاردىڭ پايدالانىلۋىنا جول بەرەدى. قاڭتار ايىندا يوبە شتاتىندا وسىعان ۇقساس اپاتتان كەمىندە 25 ادام قازا تاپقان بولاتىن.