نۇراي سەرىكبايدى ءولتىرۋ ءىسى بويىنشا سوت وتىرىسىندا قايتىس بولعان قىزدىڭ اكەسى اشۋىن ۇستاي الماي، سوتتالۋشىنىڭ اكەسىنە بۇرىن بەرگەن ۋادەسىن ەسكە سالدى، دەپ حابارلايدى infohub.kz سايتى.
باۋىرجان ساعىمبەك قىزىن ۇرلاۋ ارەكەتىنەن كەيىن جانجالدى بەيبىت جولمەن شەشۋگە بىرنەشە رەت تىرىسقانىن ايتتى. ول سوتتالۋشىنىڭ تۋىستارىمەن كەزدەسىپ، جاس جىگىتكە ىقپال ەتۋدى وتىنگەن، وسىعان ۇقساس جاعدايلاردىڭ قايتالانباۋىن سۇراعان.
قايتىس بولعان قىزدىڭ اكەسى جىگىتتىڭ وتباسى بۇدان بىلاي ونداي بولمايتىنىنا سەندىرگەنىن، الايدا بىرنەشە ايدان كەيىن قايعىلى وقيعا بولعانىن اتاپ ءوتتى. سوتتالۋشىنىڭ اكەسىنە ءسوز قاتىپ، باۋىرجان ساعىمبەك: « ۇلىڭا ىقپال ەتەمىن دەپ ايتپادىڭ با؟ نەگە ۋادەدە تۇرمادىڭ؟» دەدى.
سوتتالۋشىنىڭ اكەسى ءوز كەزەگىندە ۇلىنىڭ ىسىنە ارالاسپاق ويى جوق ەكەنىن ءبىلدىردى. بۇل باۋىرجان ساعىمبەكتىڭ اشۋىن تۋدىرىپ، ول: «ۇيات جوق پا؟! ءبىر تامشى ۇيات تا جوق! ار-ۇجدان مۇلدەم جوق!» دەپ ايقايلادى.
سونىمەن قاتار، قىزدىڭ اكەسى سوتتالۋشىنىڭ ەش جەردە جۇمىس ىستەمەگەنىن، اتا-اناسى ونى تولىق قامتاماسىز ەتىپ، ءتىپتى قىزىنا بارۋى ءۇشىن كولىك بەرگەنىن قوسىپ ايتتى. ەندى، ونىڭ ايتۋىنشا، سوتتالۋشىنىڭ تۋىستارى ونى قورعاپ، ەشتەڭە بولماعانداي كەيىپ تانىتۋدا.
ەسكە سالايىق، قايعىلى وقيعا 11 قاڭتاردا شىمكەنتتە بولدى. ايىپتالۋشىلار وتىرعان ورىندا شەرحان ايماحان ءولتىرۋ، ستالكينگ جانە نەكەگە ماجبۇرلەۋ ايىپتارى بويىنشا وتىر. پروكۋرور قىلمىستىڭ ءمان-جايى جازىلعان ايىپتاۋ اكتىسىن وقىپ شىقتى.
سوتتا جاۋاپ الۋ كەزىندە سوتتالۋشى قىزدىڭ وزىنە ءوزى شابۋىل جاساعانىن مالىمدەدى. سونداي-اق، نۇراي سەرىكبايدىڭ اكەسى قىزىمەن سوڭعى سويلەسكەنىن ايتىپ بەردى. سوتتا كۋاگەر دە، قايتىس بولعان قىزدىڭ اعالارى دا ءسوز سويلەدى. بۇدان بولەك، نۇراي سەرىكبايدى ۇرلاۋ تۋرالى ارىز بويىنشا جۇمىس ىستەگەن بۇرىنعى تەرگەۋشى دە جاۋاپ بەردى.