شىمكەنتتە نۋراي سەرىكبايدىڭ ولىمىنە بايلانىستى ءىس بويىنشا سوت وتىرىسىندا سوت-مەديسينا ساراپشىسى ءسوز سويلەپ، قايتىس بولعان قىزدىڭ العان جاراقاتتارىنا كاسىبي باعا بەردى، دەپ حابارلايدى infohub.kz سايتى.
«جەتىنشى ارنانىڭ» حابارلاۋىنشا، سوڭعى سوت وتىرىسىندا ايىپتالۋشى شەرحان ايماحاننىڭ بيىلعى جىلدىڭ مامىر ايىندا تەرگەۋ يزولياتورىندا بەرگەن جاۋاپتارىنىڭ بەينەجازباسى تىڭدالدى. سۇراق-جاۋاپ بارىسىندا ول قۇربانعا قانشا رەت پىشاق ۇرعانىن ايتتى. «نۋرايعا 7 نەمەسە 8 پىشاق جاراقاتىن سالعانىمدى ەسىمدە ساقتاپپىن. ودان ءارى دە سوققىلاردى جالعاستىرعانىمدى بىلەمىن، ءبىراق بولعان وقيعانى تولىق ەسىمە تۇسىرە المايمىن. ەسىمە كەلگەندە، قايدا كەتكەنىمدى تۇسىنبەدىم، ءبىر جەردە بولىپ شىقتىم»، — دەدى ايىپتالۋشى بەينەجازبادا.
سوت-مەديسينا ساراپشىسى جانبولات پەرنەبەكوۆ جاراقاتتاردىڭ سيپاتىنا تۇسىنىكتەمە بەرە وتىرىپ، ەڭ اۋىر جانە ولىمگە اكەلگەن جاراقاتتار كەۋدە قۋىسى مەن ءىش قۋىسىن زاقىمداعان تەرەڭ جاراقاتتار ەكەنىن اتاپ ءوتتى. «بارلىق جاراقاتتار كەۋدە جانە ءىش قۋىستارىنا ەنىپ، ىشكى اعزالاردى زاقىمداعان. بارلىعى 8 تەرەڭ جاراقات. الايدا مەنىڭ قورىتىندىمدا زاقىمدار سانى 8-دەن كوپ، ويتكەنى مويىن جانە قان تامىرلارىنىڭ جاراقاتتارى مويىن بۇلشىقەتتەرىنىڭ زاقىمدانۋىنا جاتادى. مويىن، ءىش جانە كەۋدە جاراقاتتارىنىڭ تەرەڭدىگىن ەسكەرسەك، ولاردىڭ ۇلكەن كۇشپەن سالىنعانىن ايتۋعا بولادى»، — دەپ ءتۇسىندىردى ساراپشى.
سونىمەن قاتار، سوت 19 تومنان تۇراتىن قىلمىستىق ءىستىڭ ماتەريالدارىن زەرتتەۋدى اياقتادى. سوت جارىسسوزدەرى 11 تامىزعا بەلگىلەندى.
ەسكە سالايىق، قايعىلى وقيعا 11 قاڭتاردا شىمكەنتتە بولعان. ايىپتالۋشىلار لاۋازىمىندا شەرحان ايماحان كىسى ءولتىرۋ، ستالكينگ جانە نەكەگە تۇرۋعا ماجبۇرلەۋ ايىپتارى بويىنشا وتىر. پروكۋرور قىلمىستىڭ ەگجەي-تەگجەيلەرىمەن ايىپتاۋ اكتىسىن وقىدى. تەرگەۋ دەرەكتەرى بويىنشا، نۋراي سەرىكبايعا 35 پىشاق جاراقاتى سالىنعان. قايتىس بولعان قىزدىڭ وتباسى ايىپتالۋشىدان 10 ملرد تەڭگەدەن استام ماتەريالدىق جانە مورالدىق زياندى وتەۋدى تالاپ ەتتى.