شىمكەنتتە نۇراي سەرىكبايدى ءولتىرۋ ءىسى بويىنشا سوت پروسەسى جالعاسۋدا. كەزەكتى وتىرىستا قىزدى ۇرلاعاننان كەيىن پوليسيا بولىمىندە تۇسىرىلگەن بەينەجازبانىڭ ساراپتاما ناتيجەلەرى جاريالاندى. كادرلاردا ول ايىپتالۋشىعا تالابى جوق ەكەنىن ايتادى، الايدا ساراپشىلار باسقا قورىتىندىعا كەلدى، دەپ حابارلايدى infohub.kz سايتى.
سۋديا سامميدين تەمىرلايەۆ نۇرايدىڭ شەرحان ايماحانمەن ەرىكتى تۇردە كەتكەنىن ايتقان بەينەنى زەرتتەگەن پسيحولوگيالىق-كريميناليستيكالىق ساراپتامانىڭ قورىتىندىسىن وقىپ شىقتى. سويلەۋ تالداۋى قىزدىڭ الدىن الا دايىندالعان ءماتىندى بىرەۋدىڭ ايتۋىمەن نەمەسە الدىن الا كەلىسىلگەننەن كەيىن وقىعانىن كورسەتتى.
«اڭگىمە دايەكتى جانە لوگيكالىق تۇردە باياندالعان. سويلەۋدە جازباشا تىلگە ءتان كۇردەلى سينتاكسيستىك قۇرىلىمدار بار، ءوز ويىن بايانداۋدا دەربەس باستامانىڭ بولماۋى بايقالادى. سويلەۋ ورتاشا قارقىنمەن، سارالانعان ۇزىلىستەرمەن جانە ءبىرقالىپتى، سابىرلى داۋىسپەن ايتىلادى. ساراپشىلار سويلەۋدە ءماتىندى الدىن الا ويلاستىرۋ جانە دايىنداۋ بەلگىلەرى بار دەگەن قورىتىندىعا كەلدى»، — دەدى تەمىرلايەۆ.
ساراپشىلاردىڭ قورىتىندىسى قىزدى بولىمگە جەتكىزگەن بۇرىنعى پوليسيا قىزمەتكەرى ءابىلقازى ارتىقبايدىڭ ايعاقتارىن تولىعىمەن جوققا شىعاردى. بۇعان دەيىن سوتتا ەكس-قۇقىق قورعاۋشى نۇرايعا ەشقانداي كەڭەس بەرمەگەنىن جانە ءماتىننىڭ الدىن الا دايىندالماعانىن ايتقان بولاتىن.
ەسكە سالايىق، 2026 جىلدىڭ 11 قاڭتارىندا 21 جاستاعى ستۋدەنت نۇراي شىمكەنتتە اياۋسىز ولتىرىلگەن ەدى. سوت پروسەسى جالعاسۋدا.