نيۋ-يوركتەگى فەدەرالدى تۇرمەدە جازاسىن وتەپ جاتقان ادام الياسكادان اقش وكىلدەر پالاتاسىنا سايلاۋدا پرايمەريزدەن ءوتتى. بۇل تۋرالى infohub.kz سايتى حابارلايدى.
دەموكرات رەتىندە تىركەلگەن ەريك حافنەر 2024 جىلى دا وسى ورىنعا ۇمىتكەر بولىپ، الياسكا دەموكراتيالىق پارتياسىنىڭ قارسىلىعىنا قاراماستان، قاراشا ايىنداعى جالپى سايلاۋعا قاتىسۋعا رۇقسات العان ەدى. ول 2022 جىلى پوليسيا قىزمەتكەرلەرىنە، سۋديالارعا جانە باسقا دا ادامدارعا ءقاۋىپ توندىرگەنى ءۇشىن كىناسىن مويىنداپ، 2036 جىلى بوساتىلادى.
بۇل جارىستاعى باستى ۇمىتكەرلەر — قازىرگى وكىل، رەسپۋبليكانەس نيك بەگيچ جانە كوممەرسيالىق بالىقشى ءارى زەينەتكەر ءمۇعالىم، تاۋەلسىز ۇمىتكەر بيلل حيلل. حافنەردىڭ جالپى سايلاۋعا ءوتۋى تاعى دا سوت داۋىنا اكەلۋى مۇمكىن، سەبەبى اقش كونستيتۋسياسى بويىنشا ۇمىتكەر سايلاۋ كەزىندە وكىلدىك ەتەتىن شتاتىندا تۇرۋى ءتيىس.
شتاتقا ۇسىنعان ۇمىتكەرلىك قۇجاتتاردا ول اناسى كەرول حافنەردىڭ مەكەنجايىن (وڭتۇستىك داكوتا، بوكس ەلدەر) جانە نيۋ-يورك تەلەفون ءنومىرىن كورسەتكەن. ولاردىڭ ەكەۋىنىڭ دە الياسكاعا ەشقانداي قاتىسى جوق. كەرول حافنەر بۇعان دەيىن دە سايلاۋعا ءتۇسىپ، ساتسىزدىككە ۇشىراعان، بيىل الياسكادان سەناتقا ۇمىتكەر رەتىندە قايتا سىناپ جاتىر.
الياسكانىڭ سايلاۋ جۇيەسى بويىنشا، پارتيالىق تيىستىلىگىنە قاراماستان، پرايمەريزدەگى العاشقى ءتورت ورىن جالپى سايلاۋعا وتەدى. داۋىستاردىڭ 93 پايىزى سانالعاندا ەريك حافنەر 5757 داۋىس جينادى. بۇل ءۇشىنشى ورىنداعى دەموكرات مەتت شۋلستەن ايتارلىقتاي از. الايدا شۋلس جالپى سايلاۋدان باس تارتىپ، وتە المايتىن بولدى. ءتورتىنشى ورىن ءالى انىقتالعان جوق.