«وديسسەيا» — وسى جازدىڭ ەڭ كۇتىلگەن ءفيلمى. گومەردىڭ ەجەلگى گرەك پوەماسىنىڭ بەيىمدەلگەن نۇسقاسىن كورۋگە اسىققان كورەرمەندەر كينوتەاترعا بارا الماي، ونلاين كورۋ مۇمكىندىگىن ىزدەيدى. ءدال وسى ساتتە الاياقتار پايدالانىپ، جالعان سايتتار ارقىلى ادامداردىڭ بانك دەرەكتەرىن ۇرلايدى.
جالعان سايتتاردا وڭ پىكىرلەر قالدىرىلىپ، «تەگىن» دەگەن سىلتاۋمەن بانك كارتاسىنىڭ دەرەكتەرىن ەنگىزۋدى سۇرايدى. الايدا ءفيلمنىڭ ءوزى جوق، ال پىكىرلەر — جالعان. قۇربانداردىڭ اقشاسى الاياقتاردىڭ قولىنا وتەدى.
بۇل — تانىمال فيلمدەردىڭ، سەريالداردىڭ نەمەسە ويىنداردىڭ شىعۋىنا بايلانىستى تارالاتىن كەڭ تارالعان الاياقتىق ءتۇرى. الاياقتار ەرتە نەمەسە وڭاي قولجەتىمدىلىكتى ۇسىنىپ، ادامداردىڭ قارجىلىق دەرەكتەرىن ەنگىزۋىن كۇتەدى.
ەسكەرتۋ: فيلم ءالى كينوتەاترلاردا كورسەتىلىپ جاتسا، ونى ونلاين كورۋ ۇسىنىسى — ءقاۋىپتى بەلگى. مۇنداي سايتتارعا كىرگەن ادامداردىڭ كومپيۋتەرىنە زياندى باعدارلاما جۇعۋى مۇمكىن، ال بولاشاقتا فيشينگتىك شابۋىلداردىڭ نىساناسىنا اينالۋ ءقاۋپى بار.
ۇلىبريتانيانىڭ BeStreamWise ۇيىمى ازاماتتاردى زاڭسىز ستريمينگتىڭ قاۋىپتىلىگىنەن ساقتاندىرادى. ولاردىڭ مالىمەتىنشە، جەكە دەرەكتەرىن قالدىرعان ادامدار الاياقتاردىڭ قايتا شابۋىلىنا ۇشىراۋى مۇمكىن، سونداي-اق شوتتارىنان اقشا ۇرلانۋى ىقتيمال.
«الاياقتار «وديسسەيا» سياقتى ءىرى جوبالاردىڭ اينالاسىنداعى قىزىعۋشىلىقتى پايدالانىپ، جالعان ستريمينگ سىلتەمەلەرى مەن سايتتار ارقىلى ادامداردى جەكە اقپاراتتارىن بەرۋگە جانە الاياقتىققا ۇشىراۋعا يتەرمەلەيدى»، — دەلىنگەن حابارلامادا.
بۇل الاياقتىق قالاي كورىنەدى؟ ءارتۇرلى تىلدەردە بىرنەشە جالعان سايتتار جاسالىپ، ولار سەنىمدىرەك كورىنۋگە تىرىسادى. كەيبىر جاعدايلاردا جارنامالىق باننەرلەر ارقىلى، كەيدە ىزدەۋ ناتيجەلەرىندە نەمەسە باسقا سايتتار ارقىلى تارالادى. سايتتاردا «پايدالانۋشىلاردىڭ» جالعان پىكىرلەرى مەن باعالارى ورنالاستىرىلعان.
كاسپەرسكي زەرتحاناسىنىڭ ساراپشىلارى جالعان سايتتاردىڭ كەيبىرى قۇرباننىڭ انا تىلىندە دۋبلياج ۇسىناتىنىن ايتادى. ءتىل قۇرباننىڭ گەولوكاسياسىنا قاراي تاڭدالادى. ادەتتە، ءفيلمدى ويناتۋ ارەكەتى كەزىندە تىركەلۋدى سۇرايدى، ول تەگىن دەپ كورسەتىلەدى.
تىركەلۋ كەزىندە email جانە تولىق ءاتى-جونى سۇرالادى. كەيىن بانك دەرەكتەرىن ەنگىزۋ قاجەت، سەبەبى سىناق مەرزىمىن بەلسەندىرۋ ءۇشىن قاجەت دەپ تۇسىندىرىلەدى. سايتتار ادەتتە بىرنەشە قۇرىلعىدا شەكسىز قولجەتىمدىلىكتى ۋادە ەتەدى.
نە ىستەۋ كەرەك؟ كاسپەرسكيدىڭ ساراپشىسى ولگا التۋحوۆا تۇتىنۋشىلاردى جاڭا عانا شىققان جانە ءالى كينوتەاترلاردا كورسەتىلىپ جاتقان فيلم تانىس ەمەس پلاتفورمادا پايدا بولسا، ەرەكشە ساق بولۋعا شاقىرادى. «ءبىز ادامداردى جەكە دەرەكتەرىن قورعاۋ جانە قارجىلىق شىعىنداردى بولدىرماۋ ءۇشىن تەك رەسمي سەرۆيستەر ارقىلى كونتەنتكە قول جەتكىزۋگە شاقىرامىز»، — دەيدى ول.
زاڭسىز ستريمينگتىڭ ءقاۋپى — كومپيۋتەرگە زياندى باعدارلامانىڭ جۇگۋى. بۇل حاكەرگە قۇرىلعىنى باسقارۋعا جانە قاشىقتان اقپاراتقا قول جەتكىزۋگە مۇمكىندىك بەرەدى. كاسپەرسكي سونىمەن قاتار URL مەكەنجايىن مۇقيات تەكسەرۋدى ۇسىنادى.
ەگەر الاياقتىق قۇربانى بولساڭىز، دەرەۋ بانكىڭىزگە حابارلاسىپ، بانك، ينۆەستيسيالىق جانە زەينەتاقى قورلارى سياقتى سايتتار مەن قوسىمشالارداعى قۇپيا سوزدەردى وزگەرتۋ كەرەك. سودان كەيىن قاۋىپسىزدىكتى كۇشەيتۋ ءۇشىن ەكى فاكتورلى اۋتەنتيفيكاسيانى قوسىڭىز. ۇلىبريتانيادا ۇلتتىق الاياقتىق تۋرالى حابارلاۋ ورتالىعى — Action Fraud-قا حابارلاسۋ قاجەت.