قازاقستاندا Omoda C5 جانە C5 Plus كروسسوۆەرلەرىنە كولىك ءتۇرىن ماقۇلداۋدىڭ (وتتس) جاڭا كۋالىگى بەرىلدى. ال Plus نۇسقاسى ادەتتەگى مودەلدەن ايتارلىقتاي وزگەشە. «كۋرسيۆ اۆتو» انىقتاعانداي، بۇل — كەلبەتى باسقا كولىك. Astana Motors تانىمال مودەلدىڭ تاعى ءبىر نۇسقاسىن شىعارىپ، جەرگىلىكتى وندىرىسكە قوسۋعا دايىندالىپ جاتقان سياقتى، دەپ حابارلايدى infohub.kz سايتى.
قازاقستان جولدارىندا ءجيى كەزدەسەتىن قازىرگى Omoda C5 كوزگە تانىس: كۋپە ءتارىزدى شاناق، وزىنە ءتان الدىڭعى بولىگى جانە شاعىنداۋ ولشەمدەرى. ال جاڭا C5 Plus باسقا كەلبەتكە يە بولىپ، نەعۇرلىم جاڭا بۋىن مودەل رەتىندە قابىلدانادى.
جاڭا وتتس دەرەكتەرىنە سايكەس، كولىكتىڭ ۇزىندىعى — 4545 مم، ەنى — 1824 مم، بيىكتىگى — 1588 مم، دوڭگەلەك بازاسى — 2630 مم. قوزعالتقىش قاقپاعىنىڭ استىندا قۋاتى 108 كۆت، اينالدىرۋ مومەنتى 210 نم بولاتىن 1،5 ليترلىك TCI تۋربوموتور ورناتىلعان، ول الدىڭعى جەتەكپەن جۇمىس ىستەيدى.
سونىمەن قاتار OMODA & JAECOO قازاقستاننىڭ رەسمي سايتى C5 PLUS-تى مودەل قاتارىنا قوسىپ، «جاقىندا ساتىلىمعا شىعادى» مارتەبەسىن بەرىپ قويدى.
سالون دا قازىرگى C5-تەن ايتارلىقتاي وزگەشەلەنەدى. جاڭا كولىكتە 2K اجىراتىمدىلىقتاعى 15،6 ديۋيمدىك ورتالىق ەكران، 8،88 ديۋيمدىك سيفرلىق اسپاپتار تاقتاسى جانە Qualcomm Snapdragon 8155 پلاتفورماسى ۇسىنىلعان. سونداي-اق Apple CarPlay مەن Android Auto، جوعارى نۇسقادا قۋاتى 50 ۆت سىمسىز قۋاتتاعىش جانە 540 گرادۋستىق اينالا شولۋ جۇيەسى بار.
Omoda C5 Plus قوس ءىلىنىستى 6-ساتىلى روبوتتى، ECO جانە SPORT رەجيمدەرىن، سونداي-اق ەلەكتروندى اسسيستەنتتەر جيىنتىعىن الدى. جيناقتاماعا قاراي 17 نەمەسە 18 ديۋيمدىك دوڭگەلەكتەر، ءتورت نەمەسە التى قاۋىپسىزدىك جاستىقشاسى، الدىڭعى ورىندىقتاردى جەلدەتۋ جانە ەكى ايماقتىق كليمات-باقىلاۋ قولجەتىمدى بولادى.
رەسمي دەرەكتەر بويىنشا، 100 كم/ساع-قا دەيىن جۇگىرىپ الۋ 9،9 سەكۋند الادى، ەڭ جوعارى جىلدامدىعى — 180 كم/ساع، ال جاريالانعان وتىن شىعىنى 100 كم-گە 7،3 ل قۇرايدى.
ساتىلىمنىڭ ناقتى باستالۋ كۇنى ازىرگە بەلگىسىز. الايدا C5 PLUS-تىڭ جاڭا قازاقستاندىق وتتس-تە پايدا بولۋى مودەلدىڭ جەرگىلىكتى نارىققا دايىندالىپ جاتقانىن كورسەتەدى.
ونىڭ ۇستىنە قۇجاتتاردا ءوندىرۋشى ءارى ءوتىنىش بەرۋشى رەتىندە Astana Motors Manufacturing Kazakhstan كورسەتىلگەن. بۇل مودەلدىڭ الماتىداعى كوپبرەندتى زاۋىتتا شىعارىلاتىنىن بىلدىرەدى.
بۇعان دەيىن «كۋرسيۆ اۆتو» Jaecoo J5 جانە J7 PHEV الماتىدا قۇراستىرۋ ءۇشىن وتتس العانىن جازعان بولاتىن.