وڭتۇستىك كورەيانىڭ وڭتۇستىك-شىعىسىنداعى كونسان پروۆينسياسىندا نوسەرلى جاڭبىر سالدارىنان جۇرگەن كوشكىن ءبىر ادامنىڭ قازاسىنا، ەكى ادامنىڭ جاراقات الۋىنا سەبەپ بولدى. بۇل تۋرالى infohub.kz سايتى حابارلايدى.
دۇيسەنبى تاڭەرتەڭ كودجە قالاسىنداعى تۇرعىن ءۇي كەشەنىنىڭ ءبىرىنشى قاباتىن كوشكىن باسىپ قالعان. قۇتقارۋشىلار ءۇش ادامدى قيراعان ۇيىندىلەردىڭ استىنان الىپ شىقتى، الايدا ولاردىڭ ءبىرى كەيىننەن قايتىس بولدى دەپ جەرگىلىكتى ب ا ق حابارلادى.
بۇل اپات جۇڭگو، جاپونيا جانە ءفيليپپيننىڭ كەيبىر ايماقتارىندا رەكوردتىق جاڭبىردان تۋىنداعان سۋ تاسقىنى مەن كوشكىندەر تىركەلگەن كەزەڭگە سايكەس كەلىپ وتىر. كودجە قالاسىندا ءبىر ساعات ىشىندە 124،5 ميلليمەتر جاۋىن-شاشىن تۇسكەن، بۇل وڭتۇستىك كورەيانىڭ مەتەورولوگيالىق اگەنتتىگى 1972 جىلدان بەرى جۇرگىزىپ كەلە جاتقان باقىلاۋ تاريحىنداعى ەڭ جوعارى كورسەتكىش بولىپ تابىلادى.
جەكسەنبىدەن دۇيسەنبىگە قاراعان ءتۇنى كودجەدە 400 ميلليمەتردەن استام جاڭبىر جاۋدى. الەۋمەتتىك جەلىلەردە تاسقىن سۋ كوشەلەردى شايىپ، كولىكتەردى سۋ استىندا قالعانىن كورسەتەتىن ۆيدەولار تارادى. قالا اكىمدىگى قاتتى جاڭبىرعا بايلانىستى دۇيسەنبىدە كەيبىر تۋريستىك نىسانداردىڭ جابىلاتىنىن مالىمدەدى.
سونداي-اق، سۋ باسقان نەمەسە زاقىمدالعان جولدارعا بايلانىستى اۆتوبۋس قاتىناسى مەن تۇرمىستىق قالدىقتاردى جيناۋ ۋاقىتشا توقتاتىلدى. جەكسەنبى كۇنى بيلىك تۇرعىنداردى كولىكپەن جۇرۋدەن باس تارتۋعا، وزەن جاعالاۋلارى سياقتى ءقاۋىپتى جەرلەردەن اۋلاق بولۋعا جانە قاجەت بولعان جاعدايدا ءقاۋىپسىز ايماقتارعا ەۆاكۋاسيالانۋعا شاقىردى.