جاساندى ينتەللەكت سالاسىنداعى جەتەكشى كومپانيا OpenAI قۇپيا اقپاراتتى وڭدەۋ ءتارتىبىن بۇزدى دەگەن ايىپپەن ءۇش زەرتتەۋشىسىمەن قوشتاستى. ونىڭ ىشىندە جاساندى ينتەللەكت مودەلدەرىن تالدايتىن سىرتقى ۇيىممەن بايلانىستى جۇمىستارعا قاتىسقاندار دا بار. بۇل تۋرالى كومپانيا وكىلى بريتاندىق حابار تاراتۋ كورپوراسياسىنا مالىمدەدى، دەپ حابارلايدى infohub.kz سايتى.
«تەكسەرۋ بارىسىندا بۇل ادامداردىڭ كومپانيانىڭ بەلگىلەنگەن تارتىبىنەن تىس قۇپيا اقپاراتتى وڭدەگەنى راستالدى. ولار ساياساتىمىزدى بۇزىپ، جۇمىسىمىزدىڭ نەگىزى بولىپ سانالاتىن سەنىمگە نۇقسان كەلتىردى»، — دەدى OpenAI وكىلى.
ChatGPT جاساۋشى كومپانيا جۇمىستان شىعارىلعان قىزمەتكەرلەردىڭ ەسىمىن جاريالامادى. الايدا ولاردىڭ كەمىندە ەكەۋى فيرماداعى قاۋىپسىزدىك زەرتتەۋلەرىنە قاتىسقان.
بۇل وقيعا جاساندى ينتەللەكت قاۋىپسىزدىگى مەن ونىڭ ادامزاتقا تونەتىن قاتەرى تۋرالى پىكىرتالاس قايتا قىزعان تۇستا بولدى.
«ءبىز كومپانيانىڭ قۇپيا اقپاراتىنا قول جەتكىزۋ جانە ونى وڭدەۋ جونىندەگى ساياساتىمىزدى بۇزعانى ءۇشىن ءۇش اداممەن جۇمىستى توقتاتتىق»، — دەپ تولىقتىردى OpenAI وكىلى.
بريتاندىق حابار تاراتۋ كورپوراسياسىنىڭ مالىمەتىنشە، بۇرىنعى قىزمەتكەرلەر قاۋىپسىزدىك ماسەلەسىن كوتەرگەنى ءۇشىن ەمەس، قۇپيا اقپاراتتى دۇرىس وڭدەمەگەنى ءۇشىن جۇمىستان شىعارىلعان.
جاساندى ينتەللەكت قاۋىپسىزدىگىنە قاتىستى الاڭداۋشىلىق ءبىرقاتار زەرتتەۋشى مەن سالا باسشىلارى تەحنولوگيانى قاتاڭ قاداعالاۋدى تالاپ ەتكەن سوڭ كەڭىنەن تالقىلانا باستادى.
OpenAI مودەلدەرى باقىلاۋدان شىعىپ، بىرنەشە پلاتفورمانى، سونىڭ ىشىندە اۆستراليا ۇكىمەتىنىڭ سايتتارىن بۇزعاننان كەيىن كومپانيا قاتاڭ سىنعا ۇشىرادى.
بۇعان دەيىنگى ءبىر وقيعادا OpenAI جۇيەسى ينتەرنەتكە قوسىلىپ، اشىق باستاپقى كودى بار ازىرلەۋشىلەر پلاتفورماسى Hugging Face-كە رۇقساتسىز كىرگەن.
وسى وقيعادان كەيىن OpenAI ءوزىنىڭ جاساندى ينتەللەكت مودەلدەرىنىڭ — قاراپايىم نۇسقاۋلىق بويىنشا تاپسىرمالاردى دەربەس ورىنداۋعا ارنالعان اگەنتتەردىڭ — ارەكەتتەرىنە كەڭ كولەمدى تەكسەرۋ جۇرگىزدى.
جاساندى ينتەللەكت زەرتحاناسى وسى اپتادا 100-دەن استام ۇيىمدى ءوز جۇيەلەرىنە قاتىستى رۇقساتسىز ارەكەتتەر تۋرالى حاباردار ەتكەنىن مالىمدەدى.
OpenAI-دىڭ ايتۋىنشا، حابارلاما الۋ «قانداي دا ءبىر جەكە اقپاراتقا قول جەتكىزىلدى» نەمەسە جۇيە بۇزىلدى دەگەندى بىلدىرمەيدى.