ورالدا قۇقىق قورعاۋ ورگانىنىڭ قىزمەتكەرى قىزمەتتىك وكىلەتتىگىن اسىرا پايدالاندى دەگەن ايىپپەن سوتقا تارتىلدى، دەپ حابارلايدى infohub.kz سايتى.
باتىس قازاقستان وبلىسى سوتتارىنىڭ رەسمي Telegram-ارناسىندا جازىلعانداي، ورال قالالىق سوتى قىلمىستىق كودەكستىڭ 361-بابىنىڭ 2-1-بولىگىمەن ايىپتالعان ادامعا قاتىستى قىلمىستىق ءىستى قارادى.
«سوتتالۋشى قۇقىق قورعاۋ ورگانىنىڭ قىزمەتكەرى بولا تۇرا، بقو بويىنشا قاجد مەكەمەسىندەگى سوتتالعاندار اراسىنداعى تاربيەلىك جانە الەۋمەتتىك-پسيحولوگيالىق جۇمىس بولىمىندە قىزمەت اتقارىپ، قىزمەت مۇددەسىنە قايشى ءوز وكىلەتتىگىن باسقا ادامعا پايدا تابۋ ءۇشىن پايدالاندى»، — دەدى سوتتا.
2026 جىلعى 9 اقپاننان 3 ناۋرىزعا دەيىن قىزمەتكەر وسى مەكەمەدە جازاسىن وتەپ جاتقان سوتتالعانمەن جەكە قارىم-قاتىناستا بولىپ، ونىڭ ءوتىنىشى بويىنشا مەكەمە اۋماعىنا سوتتالعانعا ارنالعان 10 بلوك (100 قاپتاما) تەمەكىنى زاڭسىز كىرگىزگەنى انىقتالدى. ول ءۇشىن 60 مىڭ تەڭگە العان.
سونىمەن قاتار، 2026 جىلعى 4 اقپاننان 3 ناۋرىزعا دەيىن ول سوتتالعاننىڭ مەكەمە اۋماعىندا ۇيالى تەلەفوندى زاڭسىز پايدالانىپ جۇرگەنىن ناقتى بىلگەن. الايدا تىيىم سالىنعان بايلانىس قۇرالىن انىقتاۋ جانە تاركىلەۋ جونىندەگى زاڭدا كوزدەلگەن شارالاردى قولدانباعان، بۇل تۋرالى تىكەلەي باسشىسىنا حابارلاماعان، سونداي-اق سوتتالعانمەن WhatsApp ارقىلى بايلانىسىپ وتىرعان. وسىلايشا سوتتالۋشى تىيىم سالىنعان بايلانىس قۇرالىن زاڭسىز پايدالانۋعا جاعداي جاساعان.
سوتتالۋشى كىناسىن تولىق مويىندادى.
سوت ەر ادامنىڭ كامەلەتكە تولماعان بالالارىنىڭ بولۋىن، سونداي-اق كىناسىن مويىنداۋداعى شىنايى وكىنىشىن قىلمىستىق جاۋاپكەرشىلىك پەن جازانى جەڭىلدەتەتىن ءمان-جايلار دەپ تانىدى.
سوت ۇكىمىمەن ول قىلمىستىق كودەكستىڭ 361-بابىنىڭ 2-1-بولىگى بويىنشا كىنالى دەپ تانىلىپ، وعان 2 جىلعا باس بوستاندىعىن شەكتەۋ جازاسى تاعايىندالدى.
قىلمىستىق كودەكستىڭ 49-بابىنىڭ نەگىزىندە سوتتالعان «ادىلەت اعا لەيتەنانتى» ارنايى اتاعىنان دا ايىرىلدى.
ۇكىم زاڭدى كۇشىنە ەندى.