ورالدا پوليسەيلەر دۇكەنگە جاسالعان توناۋ كەزىندە قارۋلى قارسىلىق كورسەتكەن كۇدىكتىنى ۇستاۋدا كورسەتكەن ەرلىگى ءۇشىن ماراپاتتالدى، دەپ حابارلايدى infohub.kz سايتى.
ىشكى ىستەر مينيسترلىگىنىڭ اقپاراتتىق مەدياپورتالىندا اتاپ وتىلگەندەي، پوليسيا قىزمەتكەرلەرى قىلمىسكەردى ۇستاۋ كەزىندە كورسەتكەن كاسىبيلىگى مەن ەرلىگى ءۇشىن ۆەدومستۆولىق ناگرادالارعا يە بولدى.
باتىس قازاقستان وبلىسى پوليسيا دەپارتامەنتىنىڭ باستىعى ارمان ورازالييەۆ ورال قالالىق پوليسيا باسقارماسىندا قىزمەت ەتەتىن پوليسيا كاپيتانى ەركەبۇلان جۇماقاشيەۆ پەن پوليسيا اعا سەرجانتى بەرىك لۇقپانوۆقا «قازاقستان پوليسياسىنا 30 جىل» توسبەلگىلەرىن تابىس ەتتى.
سالتاناتتى شارا بارىسىندا ۆەدومستۆو باسشىسى ءتارتىپ ساقشىلارىنىڭ قىراعىلىعى مەن جەدەلدىگىن ەرەكشە اتاپ ءوتىپ، ادال قىزمەتى مەن قوعامدىق قاۋىپسىزدىكتى قامتاماسىز ەتۋگە قوسقان ۇلەسى ءۇشىن العىس ءبىلدىردى.
ەسكە سالايىق، وقيعا 31 شىلدەدە ورالداعى دۇكەندەردىڭ بىرىندە بولعان. بەتپەردە كيگەن بەلگىسىز بىرەۋ ساتۋشىعا پىشاق كورسەتىپ، كاسساداعى اقشانى الىپ، وقيعا ورنىنان قاشىپ كەتكەن. جەدەل-ىزدەستىرۋ ءىس-شارالارى بارىسىندا پوليسيا قىزمەتكەرلەرى ءشوپ اراسىندا جاسىرىنىپ جاتقان ەر ادامدى بايقاعان.
ونىڭ جەكە باسىن انىقتاۋعا تىرىسقان كەزدە كۇدىكتى قارۋلى قارسىلىق كورسەتىپ، پوليسەيلەرگە پىشاقپەن شابۋىل جاساعان، الايدا ونى جەدەل زالالسىزداندىرىپ، ۇستاعان. وقيعا سالدارىنان ەشكىم زارداپ شەككەن جوق.