زەينەتاقى جيناقتارىنىڭ ارتىعىن تۇرعىن ءۇي سالىمدارىنا سالعان قازاقستاندىقتار ەندى التى جىلدان كەيىن بۇل قاراجاتتىڭ ءبىرىڭعاي جيناقتاۋشى زەينەتاقى قورىنا (بجزق) اۆتوماتتى تۇردە قايتارىلۋىنان قورىقپايدى — ءتيىستى ەرەجە كۇشىنەن الىندى، دەپ حابارلايدى infohub.kz سايتى.
بۇعان دەيىن زەينەتاقى ارتىعىن الىپ، «وتباسى بانكىندەگى» تۇرعىن ءۇي سالىمىنا سالعان ازاماتتار التى جىل ىشىندە باسپانا الۋعا مىندەتتى بولاتىن. وسى ۋاقىتتا تۇرعىن ءۇي ساتىپ الىنباسا، جيناق بجزق-داعى شوتقا قايتارىلاتىن.
الايدا «وتباسى بانكىندە» مالىمدەگەندەي، بۇل شارتتى الىپ تاستاۋعا شەشىم قابىلداندى. «ەندى اقشانى بجزق-عا قايتارۋدىڭ قاجەتى جوق. ەنگىزىلگەن وزگەرىستەرگە سايكەس، التى جىل وتكەننەن كەيىن دە قاراجات "وتباسى بانكىندەگى" سالىمىڭىزدا قالادى»، — دەلىنگەن «OTBASY NEWS – وتباسى بانك جاڭالىقتارى» رەسمي Telegram-ارناسىندا.
وسىلايشا، قازاقستاندىقتار التى جىلدىق مەرزىم ءوتتى دەگەن جەلەۋمەن جيناقتارى بجزق-عا اۆتوماتتى تۇردە قايتارىلادى دەپ الاڭداماۋى كەرەك. سونىمەن قاتار بانكتە ازاماتتارعا جەكە باسپانا الۋدى كەيىنگە قالدىرماۋدى جانە مۇمكىندىگىنشە جيناقتارىن يپوتەكانىڭ باستاپقى جارناسى رەتىندە پايدالانۋدى ۇسىندى.
ايتا كەتەيىك، تۇرعىن ءۇي سالىمدارىنان زەينەتاقى ارتىعىن الۋ ءالى دە مۇمكىن ەمەس، ال سالىمدى جاپساڭىز، قاراجات بجزق-عا قايتارىلادى. كەيبىر جاعدايلاردا قازاقستاندىققا ەسەپتەلگەن مەملەكەتتىك سىيلىقاقى دا «جانىپ» كەتەدى.