2025 جىلعى 1 قىركۇيەكتەن باستاپ شەتەلدە جۇرگەن قازاقستاندىقتارعا پاسپورت راسىمدەۋدىڭ جاڭا ەرەجەلەرى كۇشىنە ەنەدى. ءتيىستى بۇيرىققا ق ر سىرتقى ىستەر ءمينيسترى ەرمەك كوشەربايەۆ قول قويدى، دەپ حابارلايدى infohub.kz سايتى.
جاڭاشىلدىقتار ازاماتتاردىڭ كەڭ توبىنا قاتىستى: شەتەلدە تۇراقتى تۇراتىن ازاماتتار، ستۋدەنتتەر، ەڭبەك شارتى بويىنشا جۇمىس ىستەيتىندەر، قازاقستاننان تىس جەردە تۋعان كامەلەتكە تولماعاندار، سونداي-اق ولاردىڭ وتباسى مۇشەلەرى. سونىمەن قاتار، ەرەجەلەر شەتەلدە تۇراتىن شەتەل ازاماتتارىنىڭ وتباسى مۇشەلەرىنە جانە ديپلوماتيالىق قىزمەت قىزمەتكەرلەرىنىڭ تۋىستارىنا دا قولدانىلادى. تىزىمگە قارت ادامدار، مۇمكىندىگى شەكتەۋلى جاندار، ءوزىن-وزى كۇتە المايتىن جاقىندارىنا كۇتىم جاسايتىن ازاماتتار، سونداي-اق شەتەلدە ۇستالعان، قاماۋدا وتىرعان نەمەسە جازاسىن وتەپ جۇرگەندەر دە ەنگىزىلگەن.
بۇيرىق شەتەلدىك مەكەمەلەر ارقىلى پاسپورت راسىمدەۋدىڭ جاڭا مەرزىمدەرىن بەلگىلەيدى. ەگەر كونسۋلدىقتا ارنايى سيفرلىق جۇيەگە قولجەتىمدىلىك بولسا، پاسپورت مەملەكەتتىك قىزمەت اياسىندا 40 جۇمىس كۇنى ىشىندە راسىمدەلەدى. جۇيەگە قولجەتىمدىلىك بولماعان جاعدايدا مەرزىم 90 كۇنتىزبەلىك كۇنگە دەيىن ۇزارادى.
پروسەدۋرا بىلاي جۇزەگە اسادى: قۇجاتتاردىڭ تولىق پاكەتىن تاپسىرعاننان كەيىن كونسۋلدىق ازاماتتىڭ دەرەكتەرىن تەكسەرەدى جانە جۇيەدە ەلەكتروندىق ءوتىنىمدى قالىپتاستىرادى. سودان كەيىن قۇجاتتار ءىىم كوشى-قون قىزمەتى كوميتەتىنە جىبەرىلەدى، وندا تەكسەرۋ بەس جۇمىس كۇنىن الادى. ەگەر قاتەلەر بولماسا، ءوتىنىم پاسپورت دايىنداۋعا جىبەرىلەدى. دەرەكتەردە سايكەسسىزدىكتەر، فوتوسۋرەت نەمەسە قولتاڭبا پروبلەمالارى انىقتالعان جاعدايدا، قۇجاتتار قايتا وڭدەۋگە قايتارىلادى. ەسكەرتۋلەردى تۇزەتۋگە بەس جۇمىس كۇنى بەرىلەدى، ءبىراق ازاماتتىڭ جەكە قاتىسۋى قاجەت بولسا، مەرزىم ون جۇمىس كۇنىنە دەيىن ۇزارتىلۋى مۇمكىن.
العاش رەت پاسپورت الاتىن جانە ءجسن-ى جوق 14 جاسقا دەيىنگى بالالار ءۇشىن جەكە ءتارتىپ قاراستىرىلعان. بۇل جاعدايدا كونسۋلدىق جسن قالىپتاستىرۋدى باستايدى، ال ءىىم ونى ەكى جۇمىس كۇنى ىشىندە قالىپتاستىرۋى نەمەسە باس تارتۋى ءتيىس.
ەرەجەلەر كونسۋلدىقتاعى قىزمەت كورسەتۋ ۋاقىتىن دا رەتتەيدى: قۇجات تاپسىرۋ كەزىندە كۇتۋ 30 مينۋتتان، ال تىكەلەي قىزمەت كورسەتۋ 10 مينۋتتان اسپاۋى ءتيىس.