شىلدەدە قازاقستاندا پاتەر جالداۋ باعاسى ەڭ قاتتى استانادا كوتەرىلدى – ءبىر اي ىشىندە 6،9%-عا، دەپ حابارلايدى infohub.kz.
جاڭا وقۋ جىلىنىڭ باستالۋىنا ءبىر اي قالدى. بۇل كەزدە ءىرى قالالاردا جالدامالى پاتەر باعاسى ءداستۇرلى تۇردە وسە باستايدى. "كرىشا" پورتالىنىڭ (Krisha.kz) ايتۋىنشا، شىلدەدە جالداۋ باعاسى ورتا ەسەپپەن 3،1%-عا قىمباتتاعان.
ەڭ كوپ ءوسىم استانادا بايقالدى – 6،9%-عا. الماتىدا ءوسىم 3،4%، شىمكەنتتە 3،2% بولدى.
پاتەر جالداۋ باعاسىنىڭ ەداۋىر ءوسۋى قوستانايدا (6،5%)، تالدىقورعاندا (5،9%) جانە قوناەۆتا (6،5%) تىركەلدى.
تۇركىستان مەن تارازدا ورتاشا مولشەرلەمەلەر وزگەرمەگەن، ال ءبىر اي ىشىندە باعاسى تومەندەگەن ءىرى قالا جوق.
ەڭ قىمبات جالدامالى پاتەر الماتى تۇرعىندارىنا تۇسەدى – ورتا ەسەپپەن شارشى مەترىنە 5 814 تەڭگە. كەلەسى ورىنداردا: استانا (5 476 تەڭگە)، قوستاناي (4 000 تەڭگە)، وسكەمەن (3 947 تەڭگە) جانە پاۆلودار (3 846 تەڭگە). ەڭ ارزان مولشەرلەمەلەر – تۇركىستاندا (2 000 تەڭگە)، تارازدا (2 250 تەڭگە) جانە قىزىلوردادا (2 500 تەڭگە).
ءبىر بولمەلى پاتەرلەردى جالداۋدىڭ مەدياندىق مولشەرلەمەلەرى: استانا — 220 مىڭ، الماتى — 210 مىڭ، اتىراۋ — 160 مىڭ، اقتاۋ — 150 مىڭ، قاراعاندى — 150 مىڭ، قوستاناي — 150 مىڭ، وسكەمەن — 150 مىڭ، كوكشەتاۋ — 150 مىڭ، قونايەۆ — 150 مىڭ، اقتوبە — 140 مىڭ، پاۆلودار — 140 مىڭ، شىمكەنت — 140 مىڭ، سەمەي — 140 مىڭ، پەتروپاۆل — 130 مىڭ، ورال — 130 مىڭ، تالدىقورعان — 120 مىڭ، قىزىلوردا — 110 مىڭ، تۇركىستان — 100 مىڭ، تاراز — 80 مىڭ تەڭگە ايىنا.
قازىرگى ۋاقىتتا ەڭ قىمبات جالدامالى پاتەرلەر استانادا. وندا ءبىر بولمەلى جانە ءۇش بولمەلى پاتەرلەردى جالداۋ باعاسى الماتىدان جوعارى. ەلوردادا ءبىر بولمەلى پاتەر جالداۋ ورتا ەسەپپەن ايىنا 220 مىڭ تەڭگە، الماتىدا – 210 مىڭ تەڭگە. ءۇش بولمەلى پاتەرلەردىڭ ورتاشا باعاسى سايكەسىنشە 500 مىڭ جانە 400 مىڭ تەڭگەنى قۇرايدى. ايتا كەتەرلىگى، الماتىدا جالداۋ شارشى مەترى استاناعا قاراعاندا قىمباتىراق، ءبىراق ەلوردادا پاتەرلەردىڭ اۋدانى ءجيى ۇلكەن بولعاندىقتان، جالپى باعاسى جوعارى بولىپ شىعادى.
ساراپشىلاردىڭ ايتۋىنشا، تاۋلىكتىك جالداۋ باعاسى دا وسكەن. الماتىدا ءبىر اي ىشىندە ورتاشا باعا 11%-عا ءوسىپ، 20 مىڭ تەڭگەگە جەتكەن، ال استانادا 13%-عا ءوسىپ، 17 مىڭ تەڭگەنى قۇراعان.
ەسكە سالا كەتەيىك، بۇعان دەيىن الماتىنىڭ جالداۋ بويىنشا ەڭ قىمبات اۋداندارى بەلگىلى بولعان ەدى. سونداي-اق ساراپشى الماتىداعى تۇرعىن ءۇي باعاسىنىڭ جوعارى بولۋ سەبەپتەرىن تۇسىندىرگەن. ال جاقىندا ءبىز ستۋدەنتكە الماتىدا پاتەردى قالاي ءتيىمدى جالداۋعا بولاتىنىن ايتىپ بەرگەنبىز.