Telegram-نىڭ نەگىزىن قالاۋشىلاردىڭ ءبىرى پاۆەل دۋروۆ رف قك بويىنشا تەرروريزمگە جاردەمدەسۋگە كۇدىكتى. الايدا مەملەكەتتىك دۋمانىڭ اقپاراتتىق ساياسات كوميتەتىنىڭ ءتوراعاسى سەرگەي بويارسكي بۇل ايىپتىڭ روسكومنادزوردىڭ مەسسەندجەرگە قاتىستى تالاپتارىنا ەش قاتىسى جوق ەكەنىن ايتتى، دەپ حابارلايدى infohub.kz.
بويارسكيدىڭ ايتۋىنشا، رەسەي بيلىگى Telegram-عا زاڭ تالاپتارىن ورىنداماعانى ءۇشىن كوپتەن بەرى تالاپ قويىپ كەلەدى. ول «بيزنەس فم»-گە بەرگەن سۇحباتىندا: «Telegram مەسسەندجەرىنە قاتىستى ءبىرقاتار تالاپتار بار. ولار رەسەي زاڭدارىن جۇيەلى تۇردە بۇزىپ كەلەدى، سوندىقتان سوڭعى جاڭالىقتاردىڭ رەتتەۋشىنىڭ پلاتفورمانى زاڭدى تالاپتاردى ورىنداۋعا ماجبۇرلەۋ ساياساتىنا ەش قاتىسى جوق»، – دەپ مالىمدەدى.
دەپۋتات دۋروۆقا قويىلعان ايىپ پەن Telegram-عا قويىلعان تالاپتاردى بىردەي ماسەلە دەپ سانامايتىنىن، سونداي-اق قىلمىستىق ءىستىڭ ءمان-جايىن تەرەڭ زەرتتەمەگەنىن مويىندادى.
ال ادۆوكات ۆلاديمير جەرەبەنكوۆتىڭ تاسس-قا بەرگەن مالىمەتىنشە، دۋروۆتىڭ كىناسى دالەلدەنگەن جاعدايدا وعان رەسەيدە ءومىر بويى باس بوستاندىعىنان ايىرىلۋ ءقاۋپى ءتونىپ تۇر.
مەملەكەتتىك دۋمانىڭ اقپاراتتىق ساياسات كوميتەتى ءتوراعاسىنىڭ ورىنباسارى اندرەي سۆينسوۆتىڭ پىكىرىنشە، Telegram وكىلدىك اشىپ، دەربەس دەرەكتەردى ەل ىشىندە ساقتاپ وڭدەيتىن بولسا، سونداي-اق تەرروريزمگە قارسى ءىس-قيمىل ماسەلەلەرىندە ارنايى قىزمەتتەرمەن ءوزارا ءىس-قيمىل جاساسا، رەسەيدە زاڭدى تۇردە جۇمىسىن جالعاستىرا الادى.
بۇعان دەيىن رەسەي فسب دۋروۆتى رف قك 205.1-بابىنىڭ 1.1-بولىگى (تەرروريستىك ارەكەتكە جاردەمدەسۋ) بويىنشا ايىپتاپ، ونى حالىقارالىق ىزدەۋگە جاريالاعان بولاتىن. ارنايى قىزمەتتىڭ نۇسقاسى بويىنشا، Telegram اكىمشىلىگى ۋكرايندىق ارنايى قىزمەتتەر رەسەي اۋماعىندا ديۆەرسيالار، تەررورلىق شابۋىلدار، جاپپاي قانتوگىس جانە كيبەرالاياقتىق دايىنداۋ ءۇشىن پايدالانعان دەلىنەتىن ارنالاردى، چاتتار مەن بوتتاردى جويماعان. فسب بۇل رەسۋرستاردىڭ ارەكەتى ادام شىعىنىنا جانە ميللياردتاعان شىعىنعا اكەلگەنىن العا تارتادى.
ماقالا جازىلعان كەزدە پاۆەل دۋروۆ پەن Telegram وكىلدەرى رەسەي بيلىگىنىڭ ايىپتاۋلارىنا قاتىستى رەسمي تۇسىنىكتەمە بەرمەگەن بولاتىن.