پاۆلودار اۋەجايى ۇشۋ-قونۋ جولاعى اۋقىمدى رەكونسترۋكسيادان وتكەن سوڭ استانادان العاشقى رەيستى قابىلدادى، دەپ حابارلايدى infohub.kz سايتى.
استانامەن جانە الماتىمەن تۇراقتى اۋە قاتىناسى قالپىنا كەلتىرىلدى. اۋەجايدىڭ تولىققاندى جۇمىسىن قايتا باستاۋى ءۇشىن بارلىق قاجەتتى رۇقسات قۇجاتتارى مەن سەرتيفيكاتتار الىندى. 17 تامىزدا اۆياسيالىق قاۋىپسىزدىك قىزمەتى سەرتيفيكاتتالسا، 21 تامىزدا اۋەجاي اەرودرومنىڭ جارامدىلىق سەرتيفيكاتىن الدى، دەپ حابارلايدى پاۆلودار وبلىسى اكىمدىگىنىڭ ءباسپاسوز قىزمەتى.
ۇشۋ-قونۋ جولاعىنىڭ رەكونسترۋكسياسى مەملەكەت باسشىسى قاسىم-جومارت توقاەۆتىڭ تاپسىرماسىنا سايكەس جۇرگىزىلىپ، پاۆلودار وبلىسىنىڭ باستى ينفراقۇرىلىمدىق جوبالارىنىڭ بىرىنە اينالدى. جوبانى ىسكە اسىرۋعا 16،4 ملرد تەڭگە باعىتتالدى، ونىڭ ىشىندە 9،3 ملرد تەڭگە — ارنايى مەملەكەتتىك قور قاراجاتى.
جۇمىس بارىسىندا ۇشۋ-قونۋ جولاعى تولىق جاڭارتىلدى: ونىڭ ەنى 45 مەتردەن 60 مەترگە دەيىن ۇلعايتىلدى. سونىمەن قاتار، جارىق سيگنالدىق جابدىق پەن جارىقتاندىرۋ جۇيەلەرى جاڭعىرتىلىپ، بەينەباقىلاۋ جۇيەسى جاڭارتىلىپ، اەرودروم پەريمەترى بويىنشا جاڭا قورشاۋ ورناتىلدى. ناتيجەسىندە پاۆلودار قازىرگى اۆياسيالىق قاۋىپسىزدىك تالاپتارىنا سايكەس كەلەتىن جانە اۋە كەمەلەرىنىڭ كەڭ اۋقىمىن قابىلداۋعا مۇمكىندىك بەرەتىن زاماناۋي اەرودرومدىق ينفراقۇرىلىمعا يە بولدى.
اەرودرومدى قايتا جاڭارتۋمەن قاتار، پاۆلودار وبلىسىنىڭ اكىمدىگى تۇراقتى اۋە قاتىناسىن قالپىنا كەلتىرۋ جانە كەڭەيتۋ بويىنشا جۇمىس جۇرگىزدى. Vietjet Qazaqstan استاناعا اپتاسىنا 4 رەيس، ال FlyArystan الماتىعا كۇندەلىكتى رەيستەر ورىندايتىن بولادى. باعىتتار جەلىسىن كەڭەيتۋ جۇمىستارى جالعاسۋدا. SCAT اۋەكومپانياسى پاۆلوداردان اقتاۋعا، شىمكەنتكە جانە اقتوبەگە رەيستەر اشۋ مۇمكىندىگىن قاراستىرۋدا. Centrum Air كومپانياسىمەن 2027 جىلدىڭ ناۋرىزىنان باستاپ «پاۆلودار-تاشكەنت» باعىتى بويىنشا حالىقارالىق رەيس اشۋ تۋرالى الدىن الا كەلىسىمگە قول جەتكىزىلدى. سونىمەن قاتار، ماسكەۋگە، نوۆوسىبىرگە، ۇرىمشىگە، انتالياعا جانە شارم-ەل-شەيحكە جاڭا باعىتتار اشۋ مۇمكىندىگى پىسىقتالۋدا.
«ءبىز بۇل ءساتتى كوپتەن كۇتتىك. پاۆلودار وبلىسى ءۇشىن بۇل ەرەكشە ماڭىزعا يە. ايماقتىڭ گەوگرافيالىق ورنالاسۋىن ەسكەرە وتىرىپ، جاڭارتىلعان ينفراقۇرىلىم ونىڭ ترانزيتتىك الەۋەتىن ارتتىرادى. ەڭ باستىسى — ءبىز تۇراقتى رەيستەردى قايتاردىق، بۇگىن ۇشاقتار پاۆلوداردى استانامەن جانە الماتىمەن بايلانىستىرىپ تۇر. ەندى وبلىس تۇرعىندارىنىڭ ءىسساپار جانە ساياحات مۇمكىندىكتەرىن كەڭەيتۋ ءۇشىن ۇشۋ گەوگرافياسىن دايەكتى تۇردە كەڭەيتەمىز»، — دەپ اتاپ ءوتتى پاۆلودار وبلىسىنىڭ اكىمى اسايىن بايحانوۆ.
سونىمەن قاتار، اۋەجايدىڭ دامۋى اەرودرومدى قايتا جاڭارتۋمەن اياقتالمايدى. وبلىس اكىمدىگى كەلەسى اۋقىمدى كەزەڭدى — اۋەجاي عيماراتىن رەكونسترۋكسيالاۋدى دايىندادى. جوبا تەرمينالدىڭ وتكىزۋ قابىلەتىن ساعاتىنا 200-دەن 300 جولاۋشىعا دەيىن ارتتىرۋدى، ىشكى جانە حالىقارالىق جولاۋشىلار اعىندارىن ءبولۋدى، باگاجدى وڭدەۋ مەن تەكسەرۋدىڭ اۆتوماتتاندىرىلعان جۇيەسىن ورناتۋدى، تەلەسكوپيالىق تراپتارى بار 2 جولاۋشىلار گالەرەياسىن سالۋدى، سونداي-اق ينجەنەرلىك ينفراقۇرىلىمدى جاڭعىرتۋدى كوزدەيدى. تەرمينالدىڭ رەكونسترۋكسياسى اۋەجاي جۇمىسىنا اسەر ەتپەيتىنى ماڭىزدى. تۇراقتى رەيستەر ادەتتەگى رەجيمدە ورىندالاتىن بولادى.
پاۆلودار ايماقتىق جانە حالىقارالىق اۆياسيا كارتاسىنا قايتا ورالۋدا. جاڭارتىلعان ينفراقۇرىلىم اۋە قاتىناسىن ودان ءارى دامىتۋعا، ىسكەرلىك موبيلدىلىك پەن ايماقتىڭ تۋريستىك الەۋەتىنە نەگىز جاسايدى.