پاۆلودار وبلىسىنىڭ اتا-اناسىنىڭ قامقورلىعىنسىز قالعان تۇرعىنى 2008 جىلدان — ياعني بالالار ۇيىنە تۇسكەن كەزدەن باستاپ مەملەكەتتىك باسپانا كەزەگىنە قايتا قوسىلۋعا قول جەتكىزدى. سوت ونى جاۋاپتى ورگانداردىڭ ءتيىستى جۇمىس ىستەمەۋى سالدارىنان ۋاقتىلى ەسەپكە الىنباعانىن انىقتاپ، بۇل ارەكەتتى زاڭسىز دەپ تانىدى، دەپ حابارلايدى infohub.kz.
سوت مالىمەتىنشە، ب. اتا-اناسىنىڭ قامقورلىعىنسىز قالىپ، 2008 جىلى بالالار ۇيىنە تۇسكەن. الايدا ونى جەتىم بالالار مەن اتا-اناسىنىڭ قامقورلىعىنسىز قالعان بالالار ساناتى بويىنشا باسپانا كەزەگىنە تەك 2014 جىلى عانا قوسقان.
2023 جىلى ۋاكىلەتتى ورگان ونى باسقا ەلدى مەكەنگە تۇراقتى تۇرۋعا كوشكەنىن سىلتاۋراتىپ، كەزەكتەن شىعارعان. كەزەكتە وتكىزگەن التى جىل ەسەپتەلمەگەن.
ب. ءوزىن 2008 جىلدان، ياعني بالالار ۇيىنە تۇسكەن كەزدەن باستاپ كەزەككە قايتا قوسۋدى تالاپ ەتكەن. بىرنەشە رەت ءوتىنىش بەرگەنىنە قاراماستان، ونى تەك 2014 جىلدان باستاپ قانا قايتا ەسەپكە العان. سوندا ايەل سوتقا جۇگىنگەن.
ءىس قاراۋ بارىسىندا كىدىرىس ونىڭ كىناسىنەن بولماعانى انىقتالدى. بالانى ۋاقتىلى باسپانا كەزەگىنە قويۋ مىندەتى قامقورشىلىق فۋنكسيالارىن اتقارعان ورگاندار مەن ۇيىمدارعا جۇكتەلگەن.
«سوت ب.-نىڭ قامقورشىلىق فۋنكسيالارىن اتقارعان ورگاندار مەن ۇيىمداردىڭ ءوز مىندەتتەرىن تيىسىنشە ورىنداماۋى سالدارىنان ۋاقتىلى كەزەككە قوسىلماعانىن انىقتادى. يستەستىڭ كەش ەسەپكە الىنۋىنا كىناسى جوق. كامەلەتكە تولماعاندىقتان، ول ءوز بەتىنشە باسپانا قۇقىعىن جۇزەگە اسىرۋ مۇمكىندىگىنەن ايىرىلعان»، — دەلىنگەن سوت حابارلاماسىندا.
ايەل تاربيەلەنگەن بالالار ءۇيى وسى ۋاقىتقا دەيىن تاراتىلىپ كەتكەن. ال ۋاكىلەتتى ورگان ءىس ماتەريالدارىندا اتاپ وتىلگەندەي، جاعدايدىڭ قۇقىقتىق باعاسىنا اسەر ەتەتىن دالەلدەمەلەر ۇسىنباعان.
سوت جەتىم بالالار مەن اتا-اناسىنىڭ قامقورلىعىنسىز قالعان، باسپاناعا مۇقتاج دەپ تانىلىپ، ەسەپكە قويىلعان بالالار باسپانا العانعا دەيىن كەزەكتەن شىعارىلمايتىنىن ەسكە سالدى. سوت لاۋازىمدى تۇلعالاردىڭ ىس-ارەكەتتەرىنەن يستەستىڭ كونستيتۋسيالىق قۇقىقتارى مەن زاڭدى مۇددەلەرىنىڭ بۇزىلۋىنا اكەلگەن زاڭبۇزۋشىلىقتاردى انىقتادى.
ناتيجەسىندە ب.-نىڭ مەملەكەتتىك تۇرعىن ءۇي قورىنان باسپانا الۋ قۇقىعى بالالار ۇيىنە تۇسكەن كۇننەن باستاپ — 2008 جىلدان قالپىنا كەلتىرىلدى. شەشىم زاڭدى كۇشىنە ەندى.
بۇعان دەيىن «كۋرسيۆ» وتباسى بانكىندە ەكى قىزمەتكەردىڭ زاڭسىز سىياقى ءۇشىن كەزەكتە تۇرعان ادامنىڭ ساناتىن «بالاسى مۇگەدەك وتباسىلار» دەپ وزگەرتىپ، وعان باسپانا الۋدىڭ جەڭىلدىكتى شارتتارىنا ۇمىتكەر بولۋ قۇقىعىن بەرگەنىن جازعان بولاتىن. مامىلەنى توقتاتىپ ۇلگەرگەن، قىزمەتكەرلەر جۇمىستان شىعارىلعان، ال ماتەريالدار قۇقىق قورعاۋ ورگاندارىنا بەرىلگەن. بانكتە بۇل وقيعا جەكەلەگەن جاعداي ەكەنىن مالىمدەگەن.