پاۆلودار وبلىسىندا اۋىر جول-كولىك وقيعاسى بولىپ، سالدارىنان توعىز ادام، ونىڭ ىشىندە التى بالا زارداپ شەكتى. وقيعا 31 شىلدە مەن 1 تامىز ارالىعىنداعى تۇندە ەكىباستۇز – پاۆلودار تاس جولىندا بولعان. جەڭىل كولىكتىڭ جۇرگىزۋشىسى رۋلگە يە بولا الماي، ارىققا اۋدارىلىپ كەتكەن، دەپ حابارلايدى infohub.kz سايتى.
Pavlodarnews.kz باسىلىمىنىڭ مالىمەتىنشە، وقيعا ورنىنا ءۇش جەدەل جاردەم بريگاداسى شۇعىل جەتكەن. جول اپاتىنان توعىز ادام زارداپ شەككەن: ءۇش ەرەسەك جانە التى بالا. ءبىر ەر ادام مەديسينالىق تەكسەرۋدەن باس تارتقان، قالعاندارى – ايەل، ەر ادام، ەكى ۇل جانە ءتورت قىز – ءارتۇرلى جاراقاتتارمەن ەكىباستۇز قالالىق اۋرۋحاناسىنا جات قىزىلعان.
كەيىن ءۇش بالا مەن ەرەسەكتەر تەكسەرۋدەن ءوتىپ، امبۋلاتوريالىق ەمگە جىبەرىلگەن. الايدا 11 جاسار بالا رەانيماسياعا ءتۇسىپ، دارىگەرلەر وعان جابىق باس-مي جاراقاتىن، كەۋدە قۋىسىنىڭ جابىق جاراقاتىن جانە كوپتەگەن سىزاتتاردى انىقتاعان. بالانىڭ جاعدايى تۇراقتالعان سوڭ، ونى تراۆماتولوگيا بولىمشەسىنە اۋىستىرعان. ونىڭ جاعدايى ورتاشا اۋىرلىق دارەجەسىندە دەپ باعالانۋدا.