پاۆلودار تۇرعىنى تجم قىزمەتكەرىمەن داۋلاسىپ، 91 مىڭ تەڭگەگە جۋىق ايىپپۇل ارقالادى. وقيعا 28 ماۋسىم كەشكە اكادەميك ساتبايەۆ كوشەسىندەگى قايىق ستانساسىندا بولعان، دەپ حابارلايدى infohub.kz.
توتەنشە جاعدايلار دەپارتامەنتى قىزمەتكەرلەرى اكۆاتوريانى پاترۋلدەۋ كەزىندە شامادان تىس جۇكتەلگەن قايىقتى بايقاعان. وندا ەكى بالانى قوسا العاندا جەتى ادام بولعان. ال قۇتقارۋ كەۋدەشەلەرى تەك ەكى جولاۋشىدا عانا بولعان. توقتاۋ تالابىنان كەيىن قايىق جاعاعا بەت العان.
سول جەردە كەمە جۇرگىزۋشىسىنە قىزمەتتىك كاتەرگە ءوتىپ، مەديسينالىق كۋالاندىرۋدان ءوتۋ ۇسىنىلعان، الايدا ول باس تارتقان. سونىمەن قاتار، ەر ادام قۇجاتتارىن كورسەتۋدەن جانە تجم قىزمەتكەرىنىڭ زاڭدى تالاپتارىن ورىنداۋدان باس تارتقان.
سوتتا پاۆلودارلىق كىناسىن تولىق مويىنداپ، وكىنگەن. ول كامۋفلياج كيگەن ادامنىڭ شىنىمەن تجم قىزمەتكەرى ەكەنىنە كۇماندانعاندىقتان باعىنباعانىن تۇسىندىرگەن.
سوت ءىس ماتەريالدارىن، پروسەسكە قاتىسۋشىلاردىڭ تۇسىنىكتەمەلەرىن جانە وقيعانىڭ بەينەجازباسىن زەردەلەگەن. ناتيجەسىندە بۇزۋشىنىڭ كىناسى دالەلدەنگەن.
«جازا تاعايىنداۋ كەزىندە سوت كىنانى مويىنداۋ مەن وكىنۋدى جەڭىلدەتەتىن ءمان-جايلار رەتىندە ەسكەردى. سوت قاۋلىسىمەن ەر ادام ازاماتتىق قورعاۋ ورگاندارى قىزمەتكەرىنىڭ زاڭدى تالابىنا باعىنباعانى ءۇشىن كىنالى دەپ تانىلدى. وعان 90 825 تەڭگە كولەمىندە اكىمشىلىك ايىپپۇل سالىندى»، — دەپ حابارلادى سوتتا.
سوت شەشىمى زاڭدى كۇشىنە ەنگەن.