پاۆلودارلىق تۇرعىن سوت ارقىلى اكىمدىكتىڭ جالپى پايدالانۋداعى جەر ۋچاسكەسىن جەكە مەنشىككە بەرۋ تۋرالى قاۋلىسىنىڭ كۇشىن جويدى. بۇل ۋچاسكەدە اۆتوتۇراق پەن ينجەنەرلىك جەلىلەر ورنالاسقان. شەشىمدى كاسساسيالىق سوت قابىلدادى، دەپ حابارلايدى infohub.kz.
كورشى ۋچاسكەنىڭ يەسى اكىمدىك قاۋلىسىنا شاعىمدانىپ، داۋلى اۋماق جالپى پايدالانۋداعى جەرگە جاتاتىنىن، وندا ينجەنەرلىك كوممۋنيكاسيالار مەن اۆتوتۇراق ورنالاسقانىن ايتتى. ءبىرىنشى جانە اپەللياسيالىق ساتىداعى سوتتار تالاپتى قاناعاتتاندىرۋدان باس تارتتى، الايدا كاسساسيالىق ساتى قالا تۇرعىنىنىڭ جاعىنا شىقتى.
اكىمدىك قاۋلىسى قابىلدانعان كەزدە ۋچاسكە شىنىمەن جالپى پايدالانۋداعى جەرگە جاتقانى، ونىڭ مارتەبەسىن وزگەرتۋ ءراسىمى جۇرگىزىلمەگەنى انىقتالدى. سونىمەن قاتار، ۋچاسكەنى بەرۋ كەلىسىلگەن كەزدە جەر زاڭناماسىنىڭ تالاپتارى ساقتالماعان.
«سونىمەن قاتار، تومەنگى ساتىداعى سوتتار ينجەنەرلىك كوممۋنيكاسيالاردىڭ بولۋىنا جانە ءىستىڭ باسقا دا ماڭىزدى ءمان-جايلارىنا ءتيىستى باعا بەرمەگەن»، — دەپ اتاپ ءوتتى سوتتا.
كاسساسيالىق سوت مەملەكەتتىك ورگان شەشىمىنىڭ زاڭدىلىعى ونى قابىلداۋ كەزىندە قولدانىستا بولعان زاڭناماعا سايكەس باعالانۋى ءتيىس ەكەنىن اتاپ ءوتتى. ناتيجەسىندە جوعارى ساتى الدىڭعى سوتتاردىڭ اكتىلەرىن جويىپ، قالا تۇرعىنىنىڭ تالابىن تولىق قاناعاتتاندىرىپ، اكىم قاۋلىسىن زاڭسىز دەپ تانىدى.