دەنساۋلىق ساقتاۋ مينيسترلىگى انالار مەن نارەستەلەر اراسىنداعى اۋرۋحاناىشىلىك ينفەكسيالاردىڭ الدىن الۋ ماقساتىندا قازاقستانداعى بارلىق پەريناتالدىق ورتالىقتاردى كەشەندى تەكسەرۋدەن وتكىزەدى. بۇل تۋرالى infohub.kz سايتى حابارلايدى.
ۆەدومستۆو باسشىسى اقمارال ءالنازاروۆا تەكسەرۋلەردىڭ باستى ماقساتى ايىپپۇل سالۋ ەمەس، تاۋەكەلدەردى انىقتاۋ جانە جويۋ، سونداي-اق سانيتارلىق نورمالاردىڭ ساقتالۋىنا اۋديت جۇرگىزۋ ەكەنىن اتاپ ءوتتى. مينيسترلىكتىڭ مالىمەتىنشە، 69 بوساندىرۋ مەكەمەسى 15 تامىزعا دەيىن سانيتارلىق-ەپيدەميولوگيالىق باقىلاۋ كوميتەتى ماماندارىنىڭ كۇشىمەن تەكسەرىلەدى.
«ينفەكسيانىڭ ءاربىر جاعدايى كاسىبي تۇرعىدا تالدانىپ، پاسيەنتتەردىڭ قاۋىپسىزدىگىن ارتتىرۋعا باعىتتالعان شەشىمدەر قابىلدانۋى ءتيىس»، — دەدى ءالنازاروۆا.
مينيستر سونىمەن قاتار ينفەكسيالىق جاعدايلاردى تەرگەۋدىڭ قولدانىستاعى ادىستەمەلەرىن قايتا قاراۋدى، سانيتارلىق ەرەجەلەر مەن مەملەكەتتىك باقىلاۋدىڭ باقىلاۋ پاراقتارىن جاڭارتۋدى، پروفيلاكتيكاعا جانە ءاربىر وقيعانىڭ سەبەپتەرىن وبەكتيۆتى باعالاۋعا باسا نازار اۋدارۋدى تاپسىردى. وڭىرلىك دەنساۋلىق ساقتاۋ باسقارمالارىنا مەديسينالىق ۇيىمداردى دەزينفەكسيا جانە زارارسىزداندىرۋ ءۇشىن قاجەتتى رەسۋرستارمەن، جەكە قورعانىس قۇرالدارىمەن، زاماناۋي جابدىقتارمەن جانە ءبىر رەت قولدانىلاتىن شىعىس ماتەريالدارىمەن قامتاماسىز ەتۋ، سونداي-اق پەرسونالدى ينفەكسيالىق باقىلاۋ بويىنشا وقىتۋدى ۇيىمداستىرۋ تاپسىرىلدى. مەديسينالىق جانە فارماسەۆتيكالىق باقىلاۋ كوميتەتى انتيبيوتيكتەردى رەسەپت بويىنشا بوساتۋ تالاپتارىنىڭ ساقتالۋىن قاداعالاۋدى كۇشەيتەدى.
تەكسەرۋلەردىڭ قورىتىندىسى بويىنشا ءار وڭىردە ينفەكسيالىق باقىلاۋ جۇيەسىن ودان ءارى جەتىلدىرۋ بويىنشا جول كارتالارى بەكىتىلمەك. بۇعان دەيىن قازاقستاندا ەكسترەمالدى ىستىقتىڭ جۇكتى ايەلدەر مەن نارەستەلەردىڭ جاعدايىنا اسەرىن زەرتتەۋ جوسپارلانعانى حابارلانعان بولاتىن.