پەتروپاۆلدا ينكليۋزيۆتى ورتالىق سالىناتىن الاڭدى دايىنداۋ كەزىندە ادام سۇيەكتەرى تابىلدى. نىسانداعى جۇمىستار توقتاتىلىپ، تابىلعان سۇيەكتەردى قايتا جەرلەۋ جوسپارلانىپ وتىر، دەپ حابارلايدى infohub.kz سايتى.
قۇرىلىس تەحنيكاسى ۋچاسكەگە شامامەن ءۇش اپتا بۇرىن كەلگەن. كوپ ۇزاماي جۇمىسشىلار باس سۇيەكتەر، سۇيەكتەر مەن جەرلەۋ ورىندارىنىڭ قالدىقتارىن تاپقان سوڭ، الاڭدى دايىنداۋ توقتاتىلدى.
«استانا» تەلەارناسىنىڭ دەرەگىنشە، بۇل جەردە ءبىر عاسىردان استام ۋاقىت بۇرىن حريستيان زيراتى بولعان، كەيىن جاس ناتۋراليستەر ستانسياسى ورنالاسقان. اۋماقتىڭ زيرات بولعانىن جاقىن ماڭداعى شىركەۋ دە كورسەتەدى.
يەرەي انتوني شۋۆاكيننىڭ ايتۋىنشا، جۇمىستار 11 قىركۇيەكتەن باستاپ توقتاتىلعان. تالقىلاۋدان كەيىن قايتا جەرلەۋ تۋرالى شەشىم قابىلداندى، الايدا ءۇشىنشى اپتانىڭ باسىندا سۇيەكتەر ءالى كوشىرىلمەگەن. ونىڭ ايتۋىنشا، ۋچاسكەدەن تۇتاس قاڭقالار دا، ءىشىنارا جەرلەۋ ورىندارى دا تابىلعان.
ولكەتانۋشى ولەگ انتونوۆ ادام سۇيەكتەرى بۇعان دەيىن دە قالانىڭ باسقا نىساندارىنىڭ قۇرىلىسىندا تابىلعانىن، ءبىراق مۇنداي كوپ مولشەردە بولماعانىن اتاپ ءوتتى.
پەتروپاۆل اكىمدىگىندە تۇسىندىرگەندەي، ينكليۋزيۆتى ورتالىق قۇرىلىسىنىڭ تاپسىرىس بەرۋشىسى — سولتۇستىك قازاقستان وبلىسىنىڭ قۇرىلىس باسقارماسى. نىسان قالا جەرىندە سالىنىپ جاتقاندىقتان، قايتا جەرلەۋدى تۇرعىن ۇي-كوممۋنالدىق شارۋاشىلىق ءبولىمى ۇيىمداستىرىپ وتىر.
پەتروپاۆل اكىمىنىڭ ءباسپاسوز حاتشىسى تيمۋر جۇمانوۆتىڭ ايتۋىنشا، 21 قىركۇيەكتە پوليسيا سۇيەكتەردى قايتا جەرلەۋگە رۇقسات بەرەتىن قاۋلى شىعاردى. تكش ءبولىمىنىڭ مەردىگەرى ولاردى جۇمىسشى كەنتى اۋدانىنداعى زيراتقا جەتكىزۋى ءتيىس.
سۇيەكتەر ۋچاسكەنىڭ بەتىنەن جينالىپ جاتىر. ۆولونتەرلەر مەن شىركەۋ وكىلدەرى اۋماقتى تەرەڭىرەك دەڭگەيدە كاسىبي تۇردە تەكسەرۋ قاجەت دەپ سانايدى. پوليسيا ادام سۇيەكتەرىنىڭ تابىلۋىنا قاتىستى قاجەتتى شارالاردى جۇرگىزىپ جاتىر. قۇرىلىستىڭ قاشان قايتا جالعاساتىنى ازىرگە بەلگىسىز.
بۇعان دەيىن «كۋرسيۆ» سەمەيدەگى بۇرىنعى «پيششەۆيك» ستاديونىنىڭ اۋماعىنداعى قۇرىلىس الاڭىندا ادام سۇيەكتەرى تابىلعانىن جازعان. سۇيەكتەر شىعۋ تەگى مەن جەرلەنگەن ۋاقىتىن انىقتاۋ ءۇشىن ساراپتاماعا جىبەرىلدى. ودان بۇرىن شەمونايحاداعى ينفەكسيالىق اۋرۋحانا قۇرىلىسىندا وسىنداي تابىلىم بولىپ، سۇيەكتەردى جۇمىس ىستەپ تۇرعان زيراتقا قايتا جەرلەۋگە شەشىم قابىلدانعان.