پەتروپاۆلدا ينكليۋزيۆتى ورتالىق سالىپ جاتقان جۇمىسشىلار جەردەن ادام سۇيەكتەرىن شىعارىپ جاتىر. قازبا جۇمىستارى كەزىندە توپىراق استىنان سۇيەكتەر، باس سۇيەكتەر، اعاش تابىتتاردىڭ سىنىقتارى، شەگەلەر مەن كرەستتەر شىعۋدا. كەيبىر قاڭقالار تولىق دەرلىك ساقتالعان، ال كۋاگەرلەردىڭ ايتۋىنشا، تابىلعاندار اراسىندا بالالاردىڭ سۇيەكتەرى دە كەزدەسەدى، دەپ حابارلايدى infohub.kz سايتى.
بەينەجازبالاردىڭ بىرىندە ەكسكاۆاتور جۇرگىزۋشىسى جۇمىسشىلار بىرنەشە تابىت تاپقانىن ايتادى. تابىلعان سۇيەكتەردى ولار قولمەن جيناپ، قاپتارعا سالىپ جاتىر.
«بۇگىن كەزدەيسوق تابىتتى اشىپ قويدىم. ول جالعىز ەمەس. مەنىڭ كومەگىممەن جىگىتتەر بەسىنشى تابىتتى الىپ جاتىر. قۇدايىم، كەشىر. سۇيەككە تولى قاپ. مۇندا تابىت ۇستىنە تابىت. ءبىر كۇندە سونشا قاپ جينادىق. جىگىتتەر مۇنىڭ ءبارىن قولمەن ىستەپ جاتىر. سۇيەك تاپتىم، باس سۇيەك، باس سۇيەك تاپتىم. ءتۇس كورمەس ءۇشىن بۇگىن ءىشۋ كەرەك»، — دەيدى كران جۇرگىزۋشىسى ءوز بەينەجازباسىندا.
Halyqstan Telegram-ارناسى جازعانداي، ءبىر عاسىردان استام ۋاقىت بۇرىن بۇل جەردە حريستيان زيراتى بولعان. كەيىنىرەك مۇندا جاس ناتۋراليستەر ستانسياسى جۇمىس ىستەگەن. بۇل اۋماقتا سۇيەكتەر بۇرىن دا تابىلعان.
سولتۇستىك قازاقستان وبلىسى پوليسيا دەپارتامەنتى «كۋرسيۆكە» پوليسيا تەكسەرۋ باستاعانىن حابارلادى.
«سكەلەتتەلگەن سۇيەكتەر تابىلعان فاكتى بويىنشا پوليسيا ماتەريال تىركەدى. قىلمىستىق سيپات بەلگىلەرى انىقتالعان جوق. سۇيەكتەردىڭ شىعۋ تەگىن جانە تابىلۋىنىڭ وزگە دە ءمان-جايلارىن انىقتاۋ ءۇشىن تەكسەرۋ تاعايىندالدى. تۇپكىلىكتى قورىتىندى ونىڭ ناتيجەلەرى بويىنشا جاسالادى»، — دەدى پوليسيادا.
بۇعان دەيىن پەتروپاۆلدا ەسكى زيرات ورنىندا قۇرىلىس كەزىندە ادام سۇيەكتەرى تابىلعانى حابارلانعان.