پەتروپاۆلدا تانىمال كوشە سۋرەتشىسى ستانيسلاۆ الەرت ءبىر اۋلاداعى قوقىس كونتەينەرلەرىن بوياعانى ءۇشىن بەس تاۋلىككە اكىمشىلىك قاماۋعا الىندى، دەپ حابارلايدى infohub.kz سايتى.
كتك تەلەارناسىنىڭ سايتى مالىمدەگەندەي، سۋرەتشى قوقىس جاشىكتەرىندەگى جازۋنى بەينەروليك ءتۇسىرۋ ءۇشىن سالعان. دايىن كونتەنتتى ستانيسلاۆ الەرت الەۋمەتتىك جەلىلەرگە جاريالاعان، ونى سول جەردەن قۇقىق قورعاۋ ورگاندارىنىڭ قىزمەتكەرلەرى كورگەن.
ۇساق بۇزاقىلىق ءۇشىن ەر ادام بەس تاۋلىككە قامالدى. الىپ ارىپتەردى دەرەۋ بوياپ تاستاعانى دا جاۋاپكەرشىلىكتەن قۇتقارماعانى اتاپ ءوتىلدى.
بۇل وقيعا وڭىردە كەڭ رەزونانس تۋدىردى: ستانيسلاۆ الەرت ۇيلەردىڭ قاسبەتتەرىن بەزەندىرەتىن تالانتتى كوشە سۋرەتشىسى رەتىندە تانىمال، ول قالانىڭ كوپتەگەن تانىمال نىساندارىن كوركەمدەۋشى.
سوتتا ەر ادام كىناسىن مويىندادى. سۋرەتشى بۇل وقيعانىڭ ەگجەي-تەگجەيىن بوساتىلعاننان كەيىن حابارلايتىنىن ۋادە ەتتى.
«قوقىس جاشىكتەرىندە: KISS Mە دەگەن جازۋ جازىلعان بولاتىن. بۇل، شىن مانىندە، بەينەروليك ءۇشىن جاسالدى. مەن بەرلين گالەرەياسىنىڭ رەزيدەنتىمىن. الەمدىك دەڭگەيدەگى بىلىكتى سۋرەتشىمىن، قازىرگى تاڭدا مەنىڭ كارتينالارىم بەرليندە جانە فرانسيادا، پاريجدە ءىلۋلى تۇر»، — دەپ ءتۇسىندىردى ستانيسلاۆ.