پەتروپاۆلدا 21 جاستاعى جەرگىلىكتى تۇرعىنعا قاتىستى سوت پروسەسى اياقتالدى. ول ءتورت ەر ادامدى زورلادى دەپ ايىپتاعان، الايدا ءوزى جالعان ايعاق بەرگەنى ءۇشىن سوت الدىندا جاۋاپ بەردى، دەپ حابارلايدى infohub.kz.
جەتىنشى ارنانىڭ مالىمەتىنشە، وقيعا بىلتىر بولعان. قىز پوليسياعا قالاداعى پاتەرلەردىڭ بىرىندە ءتورت ەر ادام ونى ەركىنە قارسى ۇستاپ، ونىڭ ەكەۋى وعان قاتىستى جىنىستىق سيپاتتاعى زورلىق-زومبىلىق جاساعانىن حابارلاعان. ونىڭ ارىزى نەگىزىندە قىلمىستىق ءىس قوزعالعان.
الايدا سوت تەرگەۋى بارىسىندا جابىرلەنۋشى كۇتپەگەن جەردەن ايعاعىن وزگەرتىپ، جىنىستىق قاتىناسقا ەرىكتى تۇردە تۇسكەنىن مالىمدەپ، ارىزىن قايتارىپ الۋعا تىرىسقان. تەرگەۋ بارىسىندا انىقتالعانداي، ول ايعاعىن وزگەرتكەنى ءۇشىن ەر ادامداردان 1،5 ميلليون تەڭگە تالاپ ەتكەن.
ناتيجەسىندە قىزدىڭ وزىنە قاتىستى ادەيى جالعان ايىپ تاققانى ءۇشىن قىلمىستىق ءىس قوزعالعان. سوت ونى كىنالى دەپ تانىپ، بەس جىلعا باس بوستاندىعىنان ايىرۋ جازاسىن كەسكەن. الايدا امنيستيا زاڭىنا سايكەس جازا جەڭىلدەتىلگەن: مەرزىم ۇشتەن بىرىنە قىسقارتىلىپ، ونىڭ بۇرىن سوتتىلىعى بولماعانى، كىناسىن مويىنداپ، وكىنگەنى ەسكەرىلىپ، وعان 3 جىل 4 ايعا باس بوستاندىعىنان ايىرۋ جازاسى شارتتى تۇردە، پروباسيالىق باقىلاۋ ورناتىلىپ بەرىلگەن.
پروكۋراتۋرا ءبولىمىنىڭ باستىعى ەرلان جامۋلدينوۆ تۇسىندىرگەندەي: «اۋىر قىلمىس بولعاندىقتان، مەرزىمدى ۇشتەن بىرىنە قىسقارتتىق. جانە ونىڭ جەكە باسىن ەسكەرە وتىرىپ، ياعني ول بۇرىن سوتتالماعان، ءىس بويىنشا جەڭىلدەتەتىن ءمان-جايلار بار، بۇل كىناسىن مويىنداۋ جانە وكىنۋ، سوندىقتان پروباسيالىق باقىلاۋ ورناتىلىپ، شارتتى تۇردە سىناق مەرزىمى بەرىلدى. ەگەر ول ونى بۇزسا، تيىسىنشە، ول جازاسىن تولىق مەرزىمگە باس بوستاندىعىنان ايىرۋ ورىندارىندا وتەيتىن بولادى».