قازاقستان ىشكى ىستەر مينيسترلىگى قۇرامىندا پسيحوتروپتىق جانە كۇشتى اسەر ەتەتىن زاتتار بار دارىلىك قۇرالداردىڭ زاڭسىز اينالىمىنا توسقاۋىل قويۋ جۇمىسىن جۇيەلى جۇرگىزىپ كەلەدى. وسى باعىتتاعى جۇمىس بارىسىندا پەتروپاۆلدا ءجۇزۋ جاتتىقتىرۋشىسى ۇستالىپ، ودان كۇشتى اسەر ەتەتىن دارىلەردىڭ 56 تابلەتكاسى تاركىلەندى، دەپ حابارلايدى infohub.kz سايتى.
ءىىم-نىڭ اقپاراتتىق مەدياپورتالىنىڭ مالىمەتىنشە، جىل باسىنان بەرى پوليسەيلەر دەنساۋلىق ساقتاۋ ورگاندارىمەن بىرلەسىپ توقسان سايىن «دارمەك» جەدەل-پروفيلاكتيكالىق ءىس-شاراسىن وتكىزىپ كەلەدى. ونىڭ ماقساتى — ازاماتتاردىڭ دەنساۋلىعىن قورعاۋ جانە قۇرامىندا پسيحوتروپتىق پەن كۇشتى اسەر ەتەتىن زاتتار بار دارىلىك قۇرالداردىڭ زاڭسىز اينالىمىنا جول بەرمەۋ.
جۇمىس بارىسىندا مۇنداي دارىلەردىڭ دارىگەر رەسەپتىسىز بەرىلۋ فاكتىلەرى انىقتالۋدا — وعان ءدارىحانا قىزمەتكەرلەرى دە، فارماسەۆتيكالىق قىزمەتكە قاتىسى جوق وزگە دە ادامدار دا بارادى.
«اتالعان دارىلەردىڭ كامەلەتكە تولماعاندارعا ساتىلۋى ەرەكشە الاڭداۋشىلىق تۋدىرادى. مۇنداي دارىلىك قۇرالدار تەك دارىگەردىڭ تاعايىنداۋى بويىنشا بەرىلۋى ءتيىس، ويتكەنى ولاردى باقىلاۋسىز قولدانۋ اۋىر زارداپتارعا، سونىڭ ىشىندە ولىممەن اياقتالاتىن دوزادان اسىپ كەتۋگە اكەپ سوعۋى مۇمكىن»، — دەپ اتاپ ءوتتى ۆەدومستۆودا.
ءىىم دەرەگىنشە، كەزەكتى كەزەڭ 21-25 قىركۇيەك ارالىعىندا وتكىزىلدى. 1500-دەن استام مەديسينالىق مەكەمە مەن ءدارىحانا، سونداي-اق 142 ونەركاسىپ كاسىپورنى تەكسەرىلدى. 249 اكىمشىلىك قۇقىق بۇزۋشىلىق انىقتالدى. قۇرامىندا ەسىرتكىسى بار 28 مىڭ دارىلىك قۇرالدىڭ اينالىمى شەكتەلدى.
سونىمەن قاتار حيميالىق زاتتار مەن پرەكۋرسورلاردىڭ زاڭدى اينالىمنان زاڭسىز اينالىمعا وتۋىنە جول بەرمەۋ شارالارى قابىلدانۋدا. ءتۇرلى پرەكۋرسورلاردىڭ 675 تونناسىنىڭ اينالىمى شەكتەلىپ، 90 زاڭدى تۇلعا اكىمشىلىك جاۋاپكەرشىلىككە تارتىلدى.
مىسالى، پەتروپاۆلدا ءجۇزۋ جاتتىقتىرۋشىسى ۇستالىپ، ودان كۇشتى اسەر ەتەتىن زاتتاردىڭ 56 تابلەتكاسى تاركىلەندى. تۇركىستاندا ءبىر ءدارىحانادا كۇشتى اسەر ەتەتىن زاتتاردىڭ ليسەنزياسىز ساتىلعانى انىقتالىپ، 5 مىڭنان استام تابلەتكا تاركىلەندى. ورالدا ليسەنزيالاۋ نورمالارىن بۇزعانى ءۇشىن 500 توننا تۇز قىشقىلىنىڭ اينالىمى شەكتەلدى.