«پروگرەسس مس-35» جۇك كەمەسى بايقوڭىر عارىش ايلاعىنان حالىقارالىق عارىش ستانسياسىنا اتتاندى. ەكيپاجعا قاجەتتى قوردان بولەك، ول وربيتاعا قاشىقتان باسقارىلاتىن روبوتپەن جۇرگىزىلەتىن ەكسپەريمەنتكە ارنالعان جابدىقتى جەتكىزەدى، دەپ حابارلايدى infohub.kz سايتى.
«سويۋز-2.1ب» زىمىرانى 16 قىركۇيەكتە ماسكەۋ ۋاقىتىمەن 16:34-تە (استانا ۋاقىتىمەن 18:34-تە) 31-الاڭنىڭ ۇشىرۋ كەشەنىنەن ۇشتى. «روسكوسموس» كەمەنىڭ بەلگىلەنگەن وربيتاعا شتاتتىق رەجيمدە شىققانىن، زىمىراننىڭ ءۇشىنشى ساتىسىنان بولىنگەنىن جانە كۇن پانەلدەرى مەن انتەننالارىن اشقانىن مالىمدەدى.
«پروگرەسس مس-35» بارلىعى 2،4 توننادان استام جۇك جەتكىزەدى. ونىڭ ىشىندە 842 كگ وتىن، 420 كگ سۋ، 50 كگ وتتەگى، 275 كگ ازىق-ت ۇلىك، دارى-دارمەك، گيگيەنا قۇرالدارى، ستانسيا جۇمىسىنا قاجەتتى جابدىق پەن شىعىس ماتەريالدارى بار.
جۇكتىڭ ءبىر بولىگى عىلىمي ەكسپەريمەنتتەرگە، سونىڭ ىشىندە «تەلەدرويدقا» ارنالعان.
ەكسپەريمەنت اياسىندا عارىشكەرلەر انتروپومورفتى روبوتتىڭ اشىق عارىشتا قاشىقتان باسقارۋ ارقىلى جەكەلەگەن وپەراسيالاردى ورىنداي الاتىنىن تەكسەرەدى.
وسى ماقساتتا ستانسياعا عارىشكەردىڭ ارنايى جۇمىس ورنى — ەكزوسكەلەت جىبەرىلدى. ونىڭ كومەگىمەن وپەراتور روبوتتىڭ قوزعالىسىن باسقارا الادى. وپەراتور رەتىندە جۇمىسقا دايىندىقتى «روسكوسموس» عارىشكەرى اننا كيكينا ءوتتى.
«تەلەدرويدتىڭ» ءوزى حعس-قا كەلەسى جۇك كەمەسىمەن كەلەدى.
ەكسپەريمەنت بارىسىندا ەكيپاج روبوتتىڭ زاتتاردى ساقتاۋ ورنىنان الىپ، قۇرالدى عارىشكەرگە بەرە الاتىنىن جانە ونىمەن ءتۇرلى وپەراسيالاردى ورىنداي الاتىنىن تەكسەرۋدى جوسپارلاپ وتىر.
«پروگرەسس مس-35» ستانسيانىڭ رەسەيلىك سەگمەنتىندەگى «پويسك» مودۋلىمەن 19 قىركۇيەكتە ماسكەۋ ۋاقىتىمەن 16:46-دا تۇيىسەدى.
بۇعان دەيىن كۋرسيۆ رەسەيدىڭ 2027 جىلى بايقوڭىردى جالعا الۋى ءۇشىن قازاقستانعا 55 ملرد تەڭگەدەن استام تولەيتىنىن حابارلاعان.
ال قارساڭىندا «روسكوسموس» باسشىسى دميتري باكانوۆ قازاقستاننىڭ بايقوڭىردى حالىقارالىق عارىش حابىنا اينالدىرۋ باستاماسى رەسەيمەن ىنتىماقتاستىققا اسەر ەتپەيتىنىن مالىمدەدى.