«پروكۋرورلىق سۇزگى» تەتىگى اباي وبلىسىندا «ەيكوس» ءجشس-نىڭ نەگىزسىز اكىمشىلىك جاۋاپكەرشىلىككە تارتىلۋىنىڭ الدىن الدى. كومپانيا ايماقتا شينا قايتا وڭدەۋ جوباسىن جۇزەگە اسىرۋدا، دەپ حابارلايدى infohub.kz سايتى.
قاداعالاۋ ورگانىنىڭ ءباسپاسوز قىزمەتىنەن ءمالىم ەتكەندەي، باس پروكۋراتۋرانىڭ ينۆەستورلار قۇقىعىن قورعاۋ كوميتەتى ۇيلەستىرەتىن تەتىك ىسكە قوسىلدى.
پروكۋراتۋراعا كەلىسۋگە ساۋدا جانە تۇتىنۋشىلار قۇقىعىن قورعاۋ دەپارتامەنتىنىڭ كومپانيانى تۇتىنۋشىلار قۇقىعىن قورعاۋ زاڭناماسىن بۇزعانى ءۇشىن جاۋاپكەرشىلىككە تارتۋ تۋرالى قاۋلىسى ءتۇستى. الايدا تەكسەرۋ بۇعان نەگىز جوق ەكەنىن كورسەتتى. پروكۋراتۋرا كەلىسىم بەرۋدەن باس تارتىپ، ينۆەستورعا قاتىستى اكىمشىلىك قۋدالاۋدى توقتاتتى. قاۋلىنى دايىنداعان لاۋازىمدى تۇلعا تارتىپتىك جاۋاپكەرشىلىككە تارتىلدى.
ونەركاسىپ مينيسترلىگىنىڭ دەرەگىنشە، سالىنىپ جاتقان كاسىپورىننىڭ قۋاتى جىلىنا 5،7 مىڭ توننا قايتا وڭدەلگەن شينانى قۇرايدى. 2024 جىلى جاريالانعان جوبا قۇنى — 2،3 ملرد تەڭگە. ينۆەستور سونداي-اق 100 جاڭا جۇمىس ورنىن اشۋدى جوسپارلاپ وتىر.
زاۋىت تەرميالىق جانە مەحانيكالىق قايتا وڭدەۋ ادىستەرىن قولدانادى. جىلىنا 12 مىڭ توننا پايدالانىلعان شينادان: 600 توننا پەش وتىنى، 600 توننا بريكەتتەلگەن گرانۋليات، سونشا جوعارى لەگيرلەنگەن بولات سىم، 6300 توننا ءارتۇرلى فراكسياداعى رەزەڭكە تۇيىرشىكتەرى، 1500 توننا مەتالل كورد جانە 1600 توننا توقىما تالشىعى الۋ جوسپارلانۋدا. رەزەڭكە ۇگىندىسى پليتكا، سۋارۋ شلانگتارى، سپورتتىق جانە بالالار الاڭدارىنا ارنالعان جابىندار، سونداي-اق اۆتوموبيل اكسەسسۋارلارى مەن موديفيكاسيالانعان بيتۋم ءوندىرۋ ءۇشىن قولدانىلادى. زاۋىت سونىمەن قاتار مۇناي توگىلۋىنەن سۋ بەتتەرىن تازارتۋعا ارنالعان ماتەريالدار شىعاراتىن بولادى.
«پروكۋرورلىق سۇزگى» تەتىگى قازاقستاندا 2024 جىلى پرەزيدەنتتىڭ تاپسىرماسى بويىنشا ينۆەستورلاردى مەملەكەتتىك ورگانداردىڭ نەگىزسىز شەشىمدەرىنەن قورعاۋ ءۇشىن قۇرىلعان. ينۆەستورعا قاتاڭ شەكتەۋلەر نەمەسە ايىپپۇلدار قولدانار الدىندا مەملەكەتتىك ورگان پروكۋراتۋرانىڭ كەلىسىمىن الۋى ءتيىس.
«اكىمشىلىك كەدەرگىلەرگە تاپ بولعان ينۆەستورلار اباي وبلىسى پروكۋراتۋراسىنا +7 707 144 00 16 تەلەفونى نەمەسە 115 Call-ورتالىعى ارقىلى جۇگىنە الادى»، — دەپ اتاپ ءوتتى ءباسپاسوز قىزمەتىندە.
بۇعان دەيىن «پروكۋرورلىق سۇزگى» اقمولا وبلىسىندا ءساتتى جۇمىس ىستەپ، 5،8 ملرد تەڭگە تۇراتىن تاۋ-كەن بايىتۋ كومبيناتىن سالىپ جاتقان «Qazaq Kaolin» جشس-نە قاتىستى زاڭسىز تەكسەرۋ جۇرگىزگەن لاۋازىمدى تۇلعالار جازالانعان بولاتىن.