ماسكەۋ وبلىسىنداعى يسترا وزەنىنىڭ جاعاسىنداعى رەسەيلىك ءانشى اللا پۋگاچەۆاعا تيەسىلى جەر تەلىمدەرى سيمۆولدىق باعاعا ساتىلدى. ساۋدا-ساتتىق ءوتىپ، جەڭىمپاز بۇرىن بۇل جەرگە مەنشىك زاڭدىلىعىن تەكسەرۋدى باستاعان كاسىپكەر اتاندى، دەپ حابارلايدى infohub.kz سايتى.
2025 جىلدىڭ قاراشاسىندا كاسىپكەر گلەب رىسكوۆ پريمادونناعا شاعىم ءتۇسىرىپ، ونىڭ يسترا سۋ قويماسىنداعى مالىە بەرەجكي اۋىلىنداعى ءۇيىنىڭ جانىنداعى جاعالاۋ ايماعىن زاڭسىز يەلەنىپ وتىرعانىن مالىمدەدى. رەسۆودرەسۋرستار جۇرگىزگەن تەكسەرۋ بۇل دالەلدەردى راستاپ، ماتەريالدار باس پروكۋراتۋراعا جولداندى.
سوت تالقىلاۋىنىڭ ناتيجەسىندە پۋگاچەۆا جەر تەلىمدەرىن اۋكسيون ارقىلى ساتۋعا مىندەتتەلدى. جەردىڭ جالپى اۋدانى يسترا وزەنىنىڭ جاعالاۋ سىزىعىنىڭ 2،5 مىڭ شارشى مەترىن قۇرادى. جالعىز قاتىسۋشى رىسكوۆ بولعان ساۋدا-ساتتىقتا لوت 14 مىڭ رۋبلگە (شامامەن 77 مىڭ تەڭگە) ساتىلدى. الايدا، باسەكەلەستەر بولماعاندىقتان، جەڭىمپازبەن كەلىسىمشارت ساتۋعا ەمەس، 2036 جىلعا دەيىن سۋ پايدالانۋعا جاسالدى. وسىلايشا، كاسىپكەر جەر تەلىمدەرىن ون جىلعا پايدالانۋعا الدى جانە مۇندا ياحتا كلۋبىن ۇيىمداستىرۋدى جوسپارلاپ وتىر.
ەسكە سالايىق، پۋگاچەۆا مەن ونىڭ وتباسى 2022 جىلدىڭ قازانىندا رەسەيدەن كەتكەننەن كەيىن ءانشى مەن ماكسيم گالكيننىڭ ماسكەۋ تۇبىندەگى گرياز اۋىلىنداعى سارايىن تاركىلەۋ تۋرالى ۇسىنىستار مەزگىل-مەزگىل ايتىلىپ تۇرادى. بۇل ۇي-م ۇلىك رەسەيلىك كاسىپكەر جاقىندا ساتىپ العان جاعالاۋداعى جەر تەلىمدەرىنەن شامامەن 65 شاقىرىم جەردە ورنالاسقان.
كوپتەگەن باقىلاۋشىلار جەردىڭ ارزان باعاعا ساتىپ الىنۋى جۇلدىزدى جۇپتىڭ مۇلكىن تاركىلەۋ پروسەسىنىڭ باسى بولۋى مۇمكىن دەپ سانايدى. رىسكوۆتىڭ ءوزى جاقىن ارادا پۋگاچەۆانىڭ مالىە بەرەجكيدەگى ءۇيىنىڭ ءوزىن بەرۋدى تالاپ ەتپەك، سەبەبى ءانشىنىڭ ساياجايىنداعى كوپتەگەن قۇرىلىستار زاڭسىز سالىنعان دەپ ەسەپتەيدى.
ساراتوۆتان شىققان كاسىپكەر گلەب رىسكوۆ تانىمال ادامداردىڭ مەنشىك قۇقىعىنا داۋ ايتۋ ارەكەتتەرىمەن تانىمال. بۇعان دەيىن ول فيليپپ كيركوروۆتان ماسكەۋ وزەنىندەگى جەكە جاعالاۋدى سوت ارقىلى تارتىپ الۋعا تىرىسقان، سونداي-اق مورگەنشتەرننەن كىشى يسترا وزەنىنىڭ جاعالاۋ بەلدەۋىن الۋعا ۇمتىلعان. لاريسا دوليناعا قاتىستى ماسكەۋ وبلىسىندا توعان سالۋعا بايلانىستى پروكۋراتۋراعا ارىز بەرگەن.
بۇعان دەيىن Kursiv LifeStyle پۋگاچەۆانىڭ ساحناعا ورالۋىن جوققا شىعارمايتىنىن جانە كيەۆتە ونەر كورسەتۋدى ارماندايتىنىن حابارلاعان.