رەسەي فەدەراسياسىنىڭ پرەزيدەنتى ۆلاديمير پۋتين رەسەي باسقا ەلدەرگە شابۋىل جاساۋعا نيەتتى ەمەس، الايدا اگرەسسيا بولعان جاعدايدا جاۋاپ بەرۋگە ءماجبۇر بولاتىنىن مالىمدەدى. ول بۇل تۋرالى «ۆالداي» پىكىرتالاس كلۋبىنىڭ وتىرىسىندا ايتتى، دەپ حابارلايدى infohub.kz سايتى.
رەسەي كوشباسشىسىنىڭ ايتۋىنشا، ەگەر رەسەي فەدەراسياسىنا تىكەلەي شابۋىل جاسالسا — بۇل جاعدايدا كالينينگراد، مۇمكىن باسقا دا اۋماقتار ءسوز بولىپ وتىر — وندا رەسەي فەدەراسياسىنىڭ قولىنداعى بارلىق قارۋ-جاراقتى قولدانۋ ماسەلەسى كۇن تارتىبىنە دەرەۋ قويىلادى.
«ءبىز ەشكىمدى قورقىتپايمىز. ءسىز ايتقان مالىمدەمە مەن ءسىم-نىڭ كەيبىر ەلدەرگە جىبەرگەن حاتتارى — بۇل قورقىتۋ ەمەس، ءبىزدى قورقىتۋ ارەكەتىنە جاۋاپ»، — دەدى پۋتين.
ول سىرتقى ىستەر مينيسترلىگىنىڭ مالىمدەمەسىندە جانە جىبەرىلگەن حاتتاردا ءبارى دۇرىس جازىلعانىن اتاپ ءوتتى.
«ەگەر رەسەي فەدەراسياسىنا تىكەلەي شابۋىل جاسالسا، بۇل جاعدايدا كالينينگراد، مۇمكىن باسقا دا اۋماقتار ءسوز بولىپ وتىر، ارينە، رەسەي فەدەراسياسىنىڭ قولىنداعى بارلىق قارۋ-جاراقتى قولدانۋ ماسەلەسى كۇن تارتىبىنە ءسوزسىز جانە دەرەۋ قويىلادى. بۇل ءسوزسىز»، — دەپ قوستى رەسەي كوشباسشىسى.
پۋتين رەسەي ەشكىمگە شابۋىل جاساۋعا نيەتتى ەمەس، ءبىراق ءوزى اگرەسسياعا تاپ بولسا، جاۋاپ بەرۋگە ءماجبۇر بولاتىنىن، ەۋروپالىق وداق ازاماتتارى مۇنى ءتۇسىنۋى كەرەكتىگىن مالىمدەدى.
«ءبىز ەشكىمگە ءقاۋىپ توندىرمەيمىز، 29-شى، 30-شى، 50ء-شى جىلى دا ەشكىمگە شابۋىل جاساۋدى جوسپارلاپ وتىرعان جوقپىز. ءبىراق اگرەسسياعا تاپ بولساق، جاۋاپ بەرۋگە ءماجبۇرمىز. ەۋروپا ەلدەرىنىڭ ازاماتتارى مۇنى انىق ءتۇسىنىپ، ءبىزدىڭ ۇستانىمىمىزدى ءوز ەلدەرىنىڭ قازىرگى ساياسي باسشىلىعىنىڭ ۇستانىمىنان اجىراتا ءبىلۋى كەرەك»، — دەدى رەسەي پرەزيدەنتى.
ونىڭ پىكىرىنشە، بۇل تۇسىنىك بار.
«مۇنى سايلاۋ ناتيجەلەرى مەن ءىرى ەۋروپالىق ەلدەردەگى كوڭىل-كۇيدەن-اق كورىپ وتىرمىز»، — دەدى پۋتين.
رەسەي پرەزيدەنتىنىڭ پايىمداۋىنشا، بۇل ەلدەردىڭ باسشىلىعى رەسەي ەۋروپاعا يادرولىق قارۋمەن ءقاۋىپ توندىرەدى دەگەن تەزيستى پايدالانادى، سەبەبى ولار «ءوز ازاماتتارىنىڭ نازارىن وزدەرىنىڭ رەسەيگە قاتىستى اگرەسسيۆتى ساياسات جۇرگىزىپ جاتقانىنان، ازاماتتارىن قاقتىعىستىڭ ءقاۋىپتى شەگىنە تارتىپ جاتقانىنان الشاقتاتقىسى كەلەدى».