رەسەي پرەزيدەنتى ۆلاديمير پۋتين ومبىدا قاسىم-جومارت توقاەۆتى قارسى الىپ، ەكى ەل اراسىنداعى قاتىناستار ءساتتى دامىپ، ءسوز جۇزىندە ەمەس، ءىس جۇزىندە ستراتەگيالىق سيپاتقا يە ەكەنىن مالىمدەدى. بۇعان وتكەن جىلى 28 ملرد دوللارعا جۋىقتاعان تاۋار اينالىمى، ال بيىلعى جىلدىڭ العاشقى بەس ايىندا ونىڭ تاعى 4%-دان استامعا ارتۋى دالەل. بۇل تۋرالى infohub.kz سايتى حابارلايدى.
پۋتين سونداي-اق قازاقستاندا رەسەيلىك كاسىپورىندار مەن بيزنەس قاتىساتىن جالپى كولەمى 30 ملرد دوللار بولاتىن 70 جوبا ىسكە اسىرىلىپ جاتقانىن اتاپ ءوتتى. رەسەي – مەتاللۋرگيا ونەركاسىبى، ماشينا جاساۋ، ەنەرگەتيكا، فارماسەۆتيكا جانە باسقا دا باعىتتار بويىنشا قازاقستان ەكونوميكاسىنا ەڭ ءىرى ينۆەستور.
رەسەي كوشباسشىسى مادەني-گۋمانيتارلىق ىنتىماقتاستىققا ەرەكشە نازار اۋدارىپ، ءبىلىمنىڭ ماڭىزدىلىعىن اتاپ ءوتتى. مىڭداعان قازاقستاندىقتار رەسەيلىك جوعارى وقۋ ورىندارىندا ءبىلىم الۋدا، ال ومبىدا قازاقستان مەملەكەتتىك ۋنيۆەرسيتەتىنىڭ فيليالى اشىلعان. پۋتين قازاقستانعا تەگىن وقيتىن رەسەيلىك ستۋدەنتتەرگە 100 مەملەكەتتىك ستيپەنديا بەرگەنى ءۇشىن العىس ءبىلدىردى.
پۋتين سونداي-اق ەلدەردىڭ حالىقارالىق ارەناداعى بەلسەندى ءوزارا ءىس-قيمىلىن، ونىڭ ىشىندە رەسەيدىڭ ۇقشۇ-داعى جانە قازاقستاننىڭ ەاەو-داعى ءتوراعالىعى اياسىنداعى ىنتىماقتاستىقتى اتاپ ءوتتى. توقاەۆقا ءسوز ارناعان پۋتين ورتاق تاريحتى ەسكە سالدى: قازاقستاننىڭ قازىرگى پرەزيدەنتىنىڭ اكەسى 1945 جىلدىڭ قىسىندا جارالانىپ، ومبىدا ەمدەلگەن. «بۇل ءبىزدىڭ ۇلى وتان سوعىسىنىڭ جادىنا جانە حالىقتارىمىزدىڭ ءناسيزمدى جەڭۋگە قوسقان ۇلەسىنە ۇلكەن ءمان بەرەتىنىمىزدى تاعى دا ايعاقتايدى»، – دەدى پۋتين.
اڭگىمە بارىسىندا مەملەكەت باسشىلارى ساۋدا-ەكونوميكالىق بايلانىستاردى نىعايتۋ، ەنەرگەتيكا، كولىك، لوگيستيكا، عارىش جانە اۋىل شارۋاشىلىعىندا بىرلەسكەن جوبالاردى ىسكە اسىرۋ پەرسپەكتيۆالارىن تالقىلاپ، سونداي-اق حالىقارالىق جانە وڭىرلىك كۇن تارتىبىندەگى وزەكتى ماسەلەلەر بويىنشا پىكىر الماستى.