استانادا «بولاشاق ويىندارى – 2026» حالىقارالىق ءتۋرنيرىنىڭ سالتاناتتى اشىلۋ ءراسىمى ءوتتى. رەسەي پرەزيدەنتى ۆلاديمير پۋتين قاتىسۋشىلارعا قۇتتىقتاۋ ءسوز سويلەپ، قازاقستان پرەزيدەنتى قاسىم-جومارت توقاەۆقا جوعارى دەڭگەيدەگى ۇيىمداستىرۋ جانە ءداستۇرلى قازاقتىڭ قوناقجايلىلىعى ءۇشىن العىس ءبىلدىردى، دەپ حابارلايدى infohub.kz سايتى.
پۋتين «بولاشاق ويىندارى» سپورت پەن يننوۆاسيانى، فيزيكالىق جانە ينتەللەكتۋالدىق كۇرەستى بىرىكتىرەتىنىن، ال ولاردىڭ باستى ميسسياسى – ادامنىڭ ۇيلەسىمدى دامۋىنا جانە اشىق پروگرەسكە جاردەمدەسۋ ەكەنىن اتاپ ءوتتى. «ۋاقىت وتە كەلە ويىندار باعدارلاماسىنداعى دەربەس پاندەر مەن سيفرلىق سپورتتىڭ جالپى سانى ارتادى دەپ سەنەمىن»، – دەدى ول.
رەسەي كوشباسشىسى العاشقى ويىنداردىڭ 2024 جىلدىڭ اقپان-ناۋرىز ايلارىندا رەسەيدە ءوتىپ، بۇكىل الەمدەگى سپورتشىلار مەن كورەرمەندەردىڭ ۇلكەن قىزىعۋشىلىعىن تۋدىرعانىن ەسكە سالدى. «بۇل ويىندار باسىنان باستاپ ساياسات پەن كەمسىتۋشىلىكتەن ادا بولىپ كەلەدى جانە سولاي بولىپ قالا بەرەدى»، – دەپ قوستى پۋتين.
رەسەي پرەزيدەنتى قاسىم-جومارت توقاەۆتىڭ جارىستاردى ۇيىمداستىرۋعا قوسقان جەكە ۇلەسىن ەرەكشە اتاپ ءوتتى. «ءدال ونىڭ جەكە قاتىسۋى مەن بەلسەندى ۇستانىمىنىڭ ارقاسىندا ءۇشىنشى „بولاشاق ويىندارى“ استانادا ءوتىپ جاتىر… ءبىز قازاقستاندىق دوستارىمىزدىڭ داستۇرلەرىن، جومارتتىعى مەن قوناقجايلىلىعىن جاقسى بىلەمىز. سوندىقتان ويىندار ەڭ جوعارى دەڭگەيدە وتەدى، ال سپورتشىلار مەن كورەرمەندەر كوماندالاردىڭ ىمىراسىز كۇرەسىنەن كوپتەگەن جاعىمدى ەموسيا الادى دەپ سەنەمىن»، – دەپ تۇيىندەدى پرەزيدەنت.
ءوز كەزەگىندە قاسىم-جومارت توقايەۆ ۆلاديمير پۋتينگە جىلى سوزدەرى ءۇشىن العىس ءبىلدىردى. «بولاشاق ويىندارى بيىل قازاقستاندا العاش رەت ءوتىپ جاتىر. ءبىز ءۇشىن بۇل وتە ۇلكەن مارتەبە. رەسەي پرەزيدەنتى جاقىندا قازاقستانعا جانە بارلىق قاتىسۋشىلارعا ارنايى قۇتتىقتاۋ جولدادى. ۆلاديمير ۆلاديميروۆيچكە زور ريزاشىلىعىمدى بىلدىرەمىن»، – دەدى مەملەكەت باسشىسى.
ەسكە سالايىق، اشىلۋ سالتاناتىنا وزبەكستان پرەزيدەنتى شاۆكات ميرزيويەۆ، قىرعىزستان پرەزيدەنتى سادىر جاپاروۆ جانە تاجىكستان پرەزيدەنتى ەمومالي راحمون دا قاتىسۋدا.