رەسەي پرەزيدەنتى ۆلاديمير پۋتين قورعانىس مينيسترلىگىمەن كەلىسىمشارت جاساي الاتىن سوتتالعاندار ساناتىنىڭ ءتىزىمىن كەڭەيتەتىن زاڭعا قول قويدى. بۇل تۋرالى infohub.kz سايتى حابارلايدى.
جاڭا زاڭ بويىنشا قولما-قول اقشا كونترابانداسى، بانداعا نەمەسە قىلمىستىق قوعامداستىققا قاتىسقانى، سونداي-اق كۇزەتىلەتىن نىسانعا زاڭسىز كىرۋى ءۇشىن سوتتالعان ازاماتتار اسكەري قىزمەتكە كەلىسىمشارت بويىنشا الىنادى. سونىمەن قاتار، وتىن-ەنەرگەتيكا كەشەنى نىساندارىنىڭ قاۋىپسىزدىك جانە تەرروريزمگە قارسى قورعاۋ ەرەجەلەرىن بۇزعانى، ستراتەگيالىق تاۋارلاردى، مادەني قۇندىلىقتاردى، قىزىل كىتاپقا ەنگىزىلگەن جانۋارلار مەن وسىمدىكتەردى جانە ولاردىڭ تۋىندىلارىن ءىرى كولەمدە كونتراباندا جاساعانى ءۇشىن سوتتالعاندار دا كەلىسىمشارت جاساي الادى. تىزىمگە ەسىرتكى قۇرالدارىنىڭ كونترابانداسى دا ەنگىزىلگەن.
قۇجات رەسمي قۇقىقتىق اقپارات پورتالىندا جاريالاندى. سونىمەن قاتار، پۋتين اسكەري كەلىسىمشارتتارعا قاتىستى تاعى ءبىر زاڭعا قول قويدى. وندا موبيليزاسيا نەمەسە سوعىس جاعدايى كەزەڭىندە قىزمەتكە شاقىرىلعان، وسى كەزەڭدە كەلىسىمشارت جاساسقان نەمەسە اتالعان كەزەڭدە اسكەري قىزمەت ءوتىپ جاتقان ادامدار قىلمىستىق جاۋاپكەرشىلىكتەن بوساتىلۋى مۇمكىن تۇلعالاردىڭ تىزبەسى ايقىندالعان.
بۇعان دەيىن بۇل زاڭ جوباسىن مەملەكەتتىك دۋما قابىلداعان بولاتىن. قۇجات بىرنەشە كۇن بۇرىن رەسەي ۇكىمەتى تاراپىنان قاراۋعا ەنگىزىلگەن ەدى.