الەۋمەتتىك جەلىلەردە قازاقستان رەسپۋبليكاسىنىڭ قارجى ءمينيسترى مادي تاكييەۆ «ينۆەستيسيالىق قىزمەتپەن اينالىسۋعا ليسەنزيا» بەرگەنى تۋرالى جالعان اقپارات تاراپ جاتىر. قارجى مينيسترلىگى بۇل جازبالارعا رەسمي تۇردە جاۋاپ بەرىپ، ازاماتتاردى ساق بولۋعا شاقىردى، دەپ حابارلايدى infohub.kz سايتى.
«بۇل اقپاراتتىڭ شىندىققا جاناسپايتىنىن جانە شىندىققا سايكەس كەلمەيتىنىن حابارلايمىز. قازاقستان رەسپۋبليكاسىنىڭ قارجى مينيسترلىگى قارجى نارىعىنداعى بروكەرلىك، ديلەرلىك، ينۆەستيسيالىق نەمەسە وزگە دە كاسىبي قىزمەتتى ليسەنزيالاۋدى جۇزەگە اسىرمايدى»، — دەلىنگەن ۆەدومستۆو مالىمدەمەسىندە.
مينيسترلىكتە تۇسىندىرگەندەي، قازاقستان زاڭناماسىنا سايكەس ينۆەستيسيالىق كومپانيالاردىڭ، بروكەرلەردىڭ جانە قارجى نارىعىنىڭ وزگە دە كاسىبي قاتىسۋشىلارىنىڭ قىزمەتىن ليسەنزيالاۋ، تىركەۋ جانە قاداعالاۋ ۋاكىلەتتى مەملەكەتتىك ورگاننىڭ ايرىقشا قۇزىرەتىندە.
«قازاقستان رەسپۋبليكاسىنىڭ قارجى نارىعىندا قىزمەت ۇسىناتىن كەز كەلگەن ۇيىم زاڭدا بەلگىلەنگەن تىركەۋ راسىمىنەن ءوتىپ، قولدانىستاعى زاڭناما اياسىندا ءتيىستى رۇقسات الۋعا مىندەتتى»، — دەپ اتاپ ءوتتى قارجى مينيسترلىگىندە.
قارجى مينيسترلىگى ازاماتتاردى ساق بولۋعا جانە قارجى ۇيىمدارىنىڭ زاڭدىلىعىن تەك رەسمي مەملەكەتتىك تىزىلىمدەر ارقىلى تەكسەرۋگە شاقىردى.