براتيسلاۆادا جاستار اراسىنداعى كۇرەس تۇرلەرىنەن الەم چەمپيوناتى (20 جاسقا دەيىن) باستالىپ، العاشقى جۇلدەلەر جيىنتىعى ساراپقا سالىندى. گرەك-ريم كۇرەسىنەن سىنعا تۇسكەن قازاقستاندىق بالۋان ەركەبۇلان اناپيا 77 كەلىگە دەيىنگى سالماق دارەجەسىندە جۇلدەلى ورىننان ءبىر قادام عانا قالدى، دەپ حابارلايدى infohub.kz.
اناپيانىڭ قولا ءۇشىن بەلدەسۋگە جولى وزبەكستاندىق وگاربەك اسكاراليەۆتى 10:4 ەسەبىمەن سەنىمدى تۇردە ۇتۋدان باستالدى. الايدا ەكىنشى اينالىمدا ول ءازىربايجاندىق دجاۆيدان ناحماتوۆقا 5:7 ەسەبىمەن ەسە جىبەردى. كۇمىس جۇلدە ءۇشىن وتكەن كەزدەسۋدە قازاقستاندىق گرەك ادمانتيوس پاپاداتوستى 8:1 ەسەبىمەن تىزە بۇكتىرىپ، قولا ءۇشىن بەلدەسۋگە قۇقىق الدى.
قولا ءۇشىن شەشۋشى بەلدەسۋدە ەركەبۇلاننىڭ قارسىلاسى يراندىق امير ماحدي موحامماد ساەدي ناۆا بولدى. ول 5:3 ەسەبىمەن باسىم ءتۇسىپ، جەڭىسكە جەتتى. وسىلايشا، اناپيا تۋرنيردە ءتورتىنشى ورىنعا تابان تىرەدى.
قازاقستاندىق باسقا گرەك-ريم بالۋاندارى — دياس كەرتاي (63 كگ)، اليحان تاگايەۆ (87 كگ) جانە باحتيار كازييەۆ (130 كگ) — 1/8 فينال كەزەڭىندە مەدالعا تالاسۋدان شىعىپ قالدى.
سلوۆاكيا استاناسىندا حالىقارالىق كۇرەس فەدەراسياسىنىڭ (UWW) ەگيداسىمەن ءوتىپ جاتقان جاستار اراسىنداعى الەم بىرىنشىلىگىنە بارلىعى 700 جاس سپورتشى قاتىسۋدا. ولار گرەك-ريم، ەركىن جانە ايەلدەر كۇرەسىنەن 120 جۇلدە جيىنتىعىن ساراپقا سالادى. براتيسلاۆاداعى جارىستا قازاقستان اتىنان 30 سپورتشى — 20 جىگىت پەن 10 قىز — سىنعا تۇسەدى.
جاستار اراسىنداعى الەم چەمپيوناتى 23 تامىزعا دەيىن جالعاسادى.