براتيسلاۆادا ءوتىپ جاتقان گرەك-ريم، ەركىن جانە ايەلدەر كۇرەسىنەن جاستار اراسىنداعى الەم چەمپيوناتىنىڭ سوڭعى الدىنداعى كۇنى قازاقستاندىق بالۋان نۇراسىل اسامبەك (57 كەلىگە دەيىن) قولا جۇلدەگە يە بولدى، دەپ حابارلايدى infohub.kz.
اسامبەك جۇلدەگە جەتۋ جولىندا بىرنەشە سەنىمدى جەڭىسكە جەتتى. العاشقى بەلدەسۋدە ۋكراينالىق ابباس حۋسەينوۆتى 4:2 ەسەبىمەن ۇتسا، كەيىن فرانسۋز گاسپار كاميل چەينۋانى 11:0 ەسەبىمەن تىزە بۇكتىردى. شيرەك فينالدا قازاقستاندىق امەريكالىق مايكل كورتەستەن 0:6 ەسەبىمەن ۇتىلىپ قالدى، الايدا جۇبانىش بەلدەسۋىندە قىتايلىق چەنتاو ۆانگتى 10:5 ەسەبىمەن جەڭىپ، ءوزىن اقتادى. قولا ءۇشىن وتكەن شەشۋشى بەلدەسۋدە اسامبەك وزبەكستاندىق ۋلۋگبەك راشيدوۆتى 13:6 ەسەبىمەن سەنىمدى تۇردە ۇتتى.
تاعى ءبىر قازاقستاندىق بالۋان بەيبارىس ەرعالي (92 كەلىگە دەيىن) دە مەدالعا ۇمىتكەر بولعان ەدى، الايدا ءتورتىنشى ورىنمەن شەكتەلدى. ول شۆەيساريالىق ياسەك فۋدالەيدى 9:2 ەسەبىمەن ۇتىپ، كەيىن ۋكراينالىق ەگور گوروحتى بولەك شەشىممەن (3:3) جەڭدى. الايدا جارتىلاي فينالدا گرۋزيالىق ساندرو كۋراشۆيليدەن 1:6 ەسەبىمەن ۇتىلىپ، ءۇشىنشى ورىن ءۇشىن بەلدەسۋدە امەريكالىق دجەيمس مەرلە ماستنىدان 2:3 ەسەبىمەن جەڭىلىپ قالدى.
ەرالى اسكەربەك (65 كەلىگە دەيىن) پەن ايبەك قالياحمەت (79 كەلىگە دەيىن) العاشقى كەزەڭدەردە ۇتىلىپ، بۇل كۇنى مەدالدارعا قاتىسا المادى.
ءتۋرنيردىڭ سوڭعى كۇنى قارساڭىندا قازاقستان قۇراماسىنىڭ قورجىنىندا ءتورت مەدال بار. گرەك-ريم كۇرەسىنەن قىزىبەك قالماعامبەتوۆ (67 كەلىگە دەيىن) التىن، ەركىن كۇرەستەن بەكاسىل اسامبەك (61 كەلىگە دەيىن) كۇمىس، ال ۋلدانا تىلەۋحان (68 كەلىگە دەيىن) مەن نۇراسىل اسامبەك قولا جۇلدەگە يە بولدى.
حالىقارالىق كۇرەس فەدەراسياسىنىڭ (UWW) ەگيداسىمەن ءوتىپ جاتقان الەم بىرىنشىلىگىنە سلوۆاكيا استاناسىندا 700 جاس سپورتشى قاتىسۋدا. ولار كۇرەستىڭ ءۇش تۇرىنەن – گرەك-ريم، ەركىن جانە ايەلدەر كۇرەسىنەن – 120 مەدال جيىنتىعىن ساراپقا سالۋدا.
قازاقستان براتيسلاۆادا 30 سپورتشىمەن وكىلدىك ەتەدى – 20 جىگىت جانە 10 قىز. تۋرنير 23 تامىزدا اياقتالادى.